台灣名模白歆惠旋風式來港，對於o靚模比堅尼式「胸」湧而至，她不但沒有反感，更大讚一眾o靚模可愛。此外，她坦言自己仍是單身貴族，還毫不避忌說自己愛上劉青雲，不在乎他結婚與否。白歆惠認真愛得直接。
身穿低胸連身裙的白歆惠以Bella代言人來港出席活動，現場邊播放電視廣告，她邊吹肥皂泡，期間烏低身時不慎露波罅。她坦言在香港只逗留八小時，被問到取代周汶錡出任代言人？她表示自己出道時，對方已有名氣，更大讚對方有氣質，她謙虛地說：「我好鍾意佢，我真係好榮幸同佢做代言人！」
只認識3個o靚模
至於有否留意香港o靚模？她表示只認識Angelababy、Janice Man與Kama，其他一概不認識，她說：「我真係唔熟悉，唔知佢哋係咪賣弄性感，但我覺得美女分好多種，自己比較中性男仔頭多啲，佢哋係屬於甜美可愛類型，其實佢哋嘅出現都好，啲觀眾唔會咁單調，可以欣賞唔同類型人。（佢哋鍾意着比堅尼喎？）我自己都成日着，但我畀人感覺健康，我好建議女仔着比堅尼，因為曬太陽唔會咁多印之餘，又可以勇敢騷自己身材，我覺得勇敢愛自己，人哋先至會愛你，男仔都喜歡呢啲女仔！」
讚港男識氹女仔
問到有否男友？白歆惠笑言等記者介紹，她說：「香港男仔較為可愛，台灣男仔冇咁識氹女仔，鍾意扮cool！其實我都唔需要搵個有錢男友，我鍾意友善同man啲男人，好似劉青雲咁！（佢結咗婚會唔會覺得可惜？）佢結咗婚都一樣愛佢，我對佢嘅愛係唔一樣，係唔需要搶！」她又表示劉青雲若然知道有人愛他，會keep住咁好！
文：名人組