其實上一次的日本之旅，發生了一件令我好唔開心的事，就是酒店整唔見咗我件COMME des GARCONS T恤，新買的，因為是白色的關係，酒店解釋是可能服務員換床單的時候，唔覺意捲埋咗，拎咗去洗。咁，就話會幫我去追查我件衫的下落；咁，點知追查到我走嗰一日，都仲未見到我件T恤的蹤影；咁，佢哋就叫我唔使擔心，佢哋會將消息電郵畀我，如果最後都無見到我件T恤，酒店會賠番錢畀我；咁，都無辦法，惟有返香港等佢哋消息啦；咁……

好啦！最後我無收到任何酒店的消息，今次我當然無再住番呢間酒店，不過，我就走返去呢間酒店問佢哋，哈，點知我一講起，佢哋個經理就已經記得起發生過件咁嘅事，跟住就不停咁同我講對唔住唔好意思，之後就賠番錢畀我！

認真的，我無諗過佢哋會記得，仲會賠番錢畀我，我去問只是希望得到一個酒店的答覆，等自己唔使心掛掛，因為自己從來都唔係一個不了了之的人，一日未收到酒店的回覆，我就會覺得件事仲未完咁。

今次佢哋賠番錢畀我，反而搞到我有啲唔好意思。其實如果你畀番件T恤我，我諗我會仲開心啲！

時裝設計師