今年暑假早來一步。政府叫人唔好去人多擠迫地方，去海灘暢泳曬太陽就Fit晒。不過難得脫下校服，換上Bikini親親海洋，無理由仲去食沙灘小食亭嘅餐蛋麵咁「膠」啩？無論你係電車男定宅男、女神定靚模，即Check最正海灘食肆，邊食邊歎Sun Of The Beach！

沙灘旁的天堂 Paradiso

石澳海灘BBQ場出晒名，但附近食肆環境更有Feel。位處沙灘旁半露天式設計的Paradiso，一出餐廳門就是更衣室，再出就是沙灘，游個水再返入餐廳食嘢超方便。餐廳以海洋為設計主題，店主搜羅勁多貝殼做擺設，更特登從菲律賓運來魚仔、蟹仔，放在特製的吧枱和牆上的魚缸中，地上更舖滿貝殼碎激似幼沙，完全像躺在沙灘上般寫意。食物走意大利菜的簡單Casual路線，主菜、小食顏色豐富又熱情，味道亦絕不欺場；Cocktail選擇眾多，更有西班牙特色飲品Sangria及非酒精飲品，未夠秤的同學仔亦可放心享用。

查詢電話：2809 2080

牆身以岩石作裝飾，中間設有大魚缸，入面仲養咗隻海龜；吧枱面用玻璃造，玻璃下亦是魚缸，仲有蟹仔爬來爬去，女生實大叫Cutie。	地上鋪滿貝殼碎做成人工沙灘，像跟沙灘的細沙連成一線。	Sangria $65/杯 紅酒加入橙皮、水果粒調成的Cocktail，是西班牙人熱情奔放的Icon，果味重易入口。
Grilled King Prawn $165 雖然一份只有3隻，但實驗證明7個人Share綽綽有餘，因為大蝦確實超大隻又多膏，蘸點芝士味醬汁夠晒滋味。	Rib Eye Steak with Thyme Sauce $240 肉眼扒配以百里香汁，比一般的黑椒或蒜茸汁都清新，更能帶出肉眼本身的牛味。	Mia讚：可以一邊歎Pizza，一邊同Baby睇海景、吹海風，夠晒浪漫！

石澳型人搞和風堅燒

開業只有數月的堅燒，是首間設在海灘旁的日式串燒店，位置處於石澳巴士站旁。餐廳每天購入新鮮海產如鮑魚、翡翠螺等烤成串燒，老闆的朋友閒時更會潛入石澳海底「摸」些海產回來即開即煮，夠晒風味；餐廳更有自製麵豉醬，味道不像其他麵豉醬般鹹，用來蘸點海鮮串燒最正。老闆Eddy是石澳人，舖位又是自己的物業，沒有租金負擔，令食物售價更為便宜，Eddy稱有些柴灣人平日都會駕車來光顧，所花時間跟駕車出銅鑼灣差不多，但價錢平接近一半，仲有海景添！

查詢電話：2809 2321

燒鮑魚 $30/隻 鮑魚仔放上蒜茸和牛油烤香，有點像燒烤場的DIY調味法，但勝在鮑魚仔真係夠鮮。	串燒翡翠螺 $18/串 時令翡翠螺灑上海鹽後放在烤爐上燒香，口感彈牙；又可選擇蘸點混入生果的自家製麵豉醬提升味道。	串燒白鱔 $18/串 白鱔的口感沒有鰻魚般結實，但肉質滑溜，塗上燒汁烤香，風味十足。
Toby讚：估唔到海灘附近都有日本嘢食，仲要係最香口的串燒！啱晒鍾意食日本菜嘅我！Oishii！

好似去老銅咁易 Spiaggia

如果你識去銅鑼灣就一定識去赤柱，在登龍街一登上小巴便能直達，難怪赤柱被譽為全港最方便的海灘。赤柱大街的食肆人氣一向高企，最新進駐的Spiaggia，供應的食物較為兩極化，既有亞洲菜如印度薄餅、冬蔭功、杧果糯米飯，又有沙律、Pizza等意菜，皆因主廚本身是印度人，已有22年入廚經驗，故東、西兩地的菜式都做得正宗，雖然價錢較貴，但分量都不少，幾個人Share更能嘗盡大廚多元化的廚藝本領。

查詢電話：2813 7778

開放式環境不侷促，坐在半露天的酒吧旁看着熙來攘往的人群，別有一番寫意。	La Greca希臘沙律$108 酸味的Oregano沙律汁拌在蔬菜、橄欖及鹹味的Feta Cheese上，這種配搭雖然有點與別不同，但感覺極之刺激開胃。	Yam Ta Lay 泰式海鮮沙律 $128 海鮮如魷魚、帶子、青口及蝦等以泰式酸辣醬拌勻，並加入洋葱及生菜，辣不留手泰式滋味好正宗。
Salmone al Forno $118 大廚將青豆研爛後加入洋葱調味做成豆蓉，上面放着厚肉的三文魚扒，再以炸過的葱絲裝飾及調味，無論味道與賣相都落足心機，為是日重點推介。	Orni讚：去赤柱大街同去銅鑼灣一樣方便，唔使半個鐘就到，附近仲可供血拼！食物有Fine Dining水準，以後仲使約喺CWB食飯？

Rex

Mia的甜心先生，校隊成員之一，絕非宅男，陽光氣息Charm爆兼勁遷就女朋友Mia，完全是港男模範生。

Mia

情竇初開的蒸餾水女孩，與初戀男友Rex猶如孖條形影不離，去海灘着Bikini咁大件事，梗要拉埋男朋友一齊去！

Orni

無乜耐性的女生，任何事都最緊要方便快捷，要轉車要深入虎穴先去到嘅地方，基本上唔使預佢。

Toby

日本妹上身，「大眼仔」、假睫毛幾乎想戴埋返學，終日緊貼日本時尚潮流，仲話要影定輯寫真博做日模喎！

撰文：陳嘉勵

攝影：胡淑儀

鳴謝： Hill Production