天時暑熱要着住成身裝備在荒山野嶺打War Game，等於攞苦嚟辛。唔想等到秋冬先至與一大班朋友開戰，不妨試吓全港首間室內雷射War Game場X-Game Square，邊個死咗、幾時死，電腦全部有晒記錄，冇得抵賴！模特兒出身的思琳親身試玩，大讚好玩刺激，還加上一句：「最緊要係畀人射中咗都唔會紅、唔會痛吖嘛！」貪靚，果然係女人嘅本色！
撰文：陳若冰 查詢電話：2191 2878
輕裝無痛殺敵
來到X-Game Square，玩家基本上乜都唔使帶，行入去就可以隨時開戰。每位玩家會戴上頭盔和穿上戰鬥服，其實只是像一條孭帶的東西，上面設有感應系統，當被敵人射中時，便會感受到震動和發出響聲，並亮着紅光，表示經已陣亡，同時雷射槍亦會自動被鎖起不能再發射，避免玩BB彈時經常出現的「不死人」（即被射中但唔認的人）。雷射槍的設計經過精心改裝，會發出不可見的紅外線光，還會模擬真槍的槍聲和震動，也可設定彈匣數量。不過最緊要都係好似思琳話齋，射中咗都唔會痛！
救護兵無限復活
整套雷射裝備由先進的無線通訊技術與電腦配合組成，透過相關的軟件，更可以即時記錄所有戰鬥數據，如每位玩家幾時死、殺了誰或被誰殺了等，玩完之後來個總結算，看看誰是Top Killer。也因為具備這套系統，令CQB（Close Quarter Battle，近距離戰鬥）的玩法增加不少。除了常見的搶據點、救人質等玩法，X-Game Square還加入「復活系統」，像「Battlefield」電腦遊戲中，由救護兵負責營救被擊中的隊員令他「復活」。想贏？惟有鬥快把敵方的救護兵殺死！
警局銀行任射
有玩開室內CQB的朋友，來到X-Game Square都會感到嘆為觀止，並不只是因為這裏有近二萬平方呎的寬闊場地，還會被它的香港街頭實景設計所吸引，與一般室內CQB簡陋的設計相比，這裏簡直可以用「豪裝」來形容。場地劃分為不同的戰區，每個戰區都各具特色，包括警局、便利店、街市、油站、銀行、戲院等，玩起來特別有投入感。除了雷射槍，X-Game Square亦有提供氣槍對戰裝備。
專家教路：事前策略最緊要
玩War Game超過5年經驗的Ivan告訴記者，通常第一次玩的朋友，最容易犯的錯誤是一開Game便橫衝直撞，結果當然傷亡慘重。他說：「玩之前最好先認清四周環境，觀察哪些地方可以作為戰鬥的據點，並且選出一位首領，若多人時更可分為幾個小隊，然後分工指派各人應守的位置。」Ivan續指，在遊戲進行時，為免讓敵方得悉自己的位置，最好使用隊員之間都看得明白的手勢，如示意進攻、停步、有敵人等，有經驗的玩家會參考特種部隊的手勢。
思琳：「女仔都玩得！」
思琳表示今次是她第一次玩CQB，之前曾跟朋友到戶外玩過氣槍，感覺截然不同。她說：「上一次在戶外玩BB彈，在荒山野嶺又熱又多蚊，支槍又重，還要在整個山頭通山跑，更加冇想過被射中會係咁痛，返到屋企紅咗兩日。雖然好刺激，但係玩完一次之後，朋友再叫我都唔敢再去了！」今次來到X-Game Square，她的第一印象竟然係「個冷氣幾夠涼喎！」然後教她驚喜的是不用穿上又熱又重的裝備，而且被射中亦唔會痛，扮起羅拉自然更瀟灑。