我有位朋友個朋友嘅朋友，未夠21歲就乜都唔使做，皆因佢畀一個有錢生意人私有化咗，嫁入豪門做少奶奶，聽番個朋友嘅另一位朋友講，少奶奶近日忙於玩湊仔之外，仲諗住入廚玩下煮飯仔，於是四出選購廚房用品，而佢一向卡娃兒，揀嘅煲煲罉罉同圍裙當然要襯佢！以下介紹嘅不但只靚，而且實用，連我見到都大為心動。我位朋友個朋友嘅朋友你識唔識？我鬼知你識啲咩人呀！

碎花「Dot柄」走入廚房

不少廚房用品設計都緊貼Fashion潮流，令愛打扮的少女也多一份衝動走入廚房玩玩煮飯仔，碎花跟「Dot柄」一向是少女界熱捧的經典大熱Pattern，加上清新的粉彩色調及花邊做成圍裙，看起來特別可愛，而Cutting方面，竟然出現了露背、Deep-V、迷你裙，少了一點點布，換來了一點點性感，功能方面，還是算了罷……

Peach John「Dot柄」半截圍裙 $305（b） 出開性感內衣的Peach John，居然性感殺入廚房，加設幾款睡前服設計的圍裙，加上呢士花邊點綴，着出街都得。	Franc Franc碎花連身圍裙$245（c） 今年春、夏季大熱的碎花Pattern做成圍裙，不慎穿了上街也沒大不了。	Peach John碎花心心迷你裙圍裙$400（b） 胸前一個花邊大心心，加上一條短到不能再短的迷你裙，着成咁煮飯仔，令人想入非非，煮出來的是甚麼也不重要。

日本公仔廚具　香港有得賣

經常去日本掃貨的潮友，偶爾都會在Zakka店中找到Cutie如公仔的Smile廚具、可愛小豬Lucky Pig餐具等，其實這幾個系列都是出自日本Zakka品牌Sugar Land，在日本Sugar Land已經Hit了好一段日子，但在香港就甚少見到，不過現在於銅鑼灣世貿的SaLa家具雜貨店，就有齊全線的Smile廚具及大部分Lucky Pig餐桌用品出售，價錢跟去日本購買差不多，買咗擺喺屋企唔用都可以當裝飾。

Peach John粉黃色工作手袖$145（b） 一般工作手袖是用來防污，大家覺得粉黃色能夠防污嗎？	Smile搪瓷煮食鍋$400（a） Smile系列有四款設計，分別為小鴨、小豬、小熊及小木偶，每款都有煮食鍋、水煲及單柄煲，別看小鴨煮食鍋外形可愛，其實直徑也十分大，絕對夠實用。	Smile搪瓷水煲$460（a） 全線Smile煮食系列都適用於電磁爐，適合無火煮食的新派家庭，豬豬小水煲就不怕變成燒乳豬了！
在世貿的SaLa雖然地方不太大，但貨品十分齊全，喜歡替屋企添置小玩意的人又有好去處。

撰文：鄧善文 攝影：郭凱敏

模特兒：Irina（Color Zone）

電話：（a）2479 2907、（b）2577 6012、（c）3427 3366