iPod喇叭由幾百、一千元嘅「國產貨」到幾千元嘅歐、美音響名牌都有出，豐儉由人。想聽靚聲嘅iPod及iPhone機主，不妨諗吓呢套法蘭西名牌貨Focal XS Multimedia Sound System 2.1組合，除咗外形設計似足iMac，更用埋同廠賣幾十萬嘅專業喇叭當中嘅技術去製造，四千幾蚊其實唔算貴！

延伸力強

法國音響品牌Focal在專業喇叭市場上都幾出名，亦係少有可一手包辦喇叭單元、分音器、音箱設計同製造嘅廠商。新2.1聲道iPhone喇叭Focal XS用上同廠鑑聽級喇叭Solo6去調音，質素實在高。即場試聽人聲同樂器音，以iPod喇叭嚟講，兩方面都相當理想，動態表現出色，採用反射式設計嘅超低音喇叭可以由150Hz下潛至39Hz，而衞星喇叭採用二路單元設計，高、中音清晰、細膩，相比下人聲表現更突出。

卡片形遙控器附有磁力，可黐在銀腳架上。	超低音喇叭內置三聲道擴音器，輸出功率可達70W。	底座設有Sync掣，可直接將iPhone、iPod中的資料跟電腦同步。

iMac設計

Focal XS外觀甚靚，以銀腳配鋼琴黑底座設計，其支撐架嘅設計同屈曲度，更跟iMac似到足。Focal XS定位電腦及iPod兩用，廠方更特別應用到Visual and Sound Coincidence技術，可以利用枱面同顯示屏表面反射去定位，就算將喇叭放在iMac旁邊，都唔會畀顯示屏嘅擺位影響發聲！另外，不能不提係喇叭設有磁力遙控器，可以學似iMac將遙控器黐在支撐架之上；而且底座更設Sync掣，一按即可將iPod或iPhone跟電腦同步，極方便。

撰文：布偉倫　攝影：陳富權　查詢電話：3188 0767