影壇新貴沙拉保夫自小已是Game迷，他主演的《變形金剛》登陸Xbox 360當然搶先試玩，上集佢就彈隻Game得單機版唔夠喉，所以今集Activision從善如流在「Transformers：Revenge of the Fallen」內加入8人對戰模式，讓用家任揀博狂機體進行搶旗戰和殲滅戰等多種玩法，平時過關後仲可以計分「升呢」，好玩程度攞滿分。

電影情節 博狂任揀

小記個多星期前經已玩過新Game，但礙於套戲未公映，唔可以洩露劇情和畫面先至收得咁密實。皆因遊戲跟足電影情節和場景設計，由美國打到太平洋艦隊、埃及沙漠和上海鬧巿等，更有大批博狂新機登場，好似傳說中的合體建造派、坦克麥加登等。玩家仲可以扮完博派保衞地球，再用狂派四處破壞，最吸引是搵番戲中沙拉保夫、美瑾霍絲和變形金剛原聲配音，猶如置身電影之中。

過關升呢 強化裝備

剛開始遊戲當然冇得揀柯柏文等勁機，要逐關完成後才可跟劇情Unlock機體，每隻角色都備有主副武器和超必，好似大黃蜂擁有雷射槍和機槍，儲滿能量則可出超必電暈對手；而力捷除了手槍外，更備有維修隊友能力，小組對戰時是重要夥伴。

除了招式比上集豐富，遊戲亦加入「Override」計量器，爆滿時可進入無敵狀態狂掃敵人，玩落有點似街機Gundam般爆Seed，不同的是完成每關任務後，系統會因應表現作出評分，讓玩家用EXP升級裝備，例如增加裝甲血量、提升超必和攻擊力等，令玩法變得多元化。

連線對戰 殲敵搶旗

網上對戰已成為熱門遊戲必備元素，所以今集「變形金剛」徇眾要求加入2~8人對戰模式，除基本「Deathmatch」小組對戰或混戰外，更創新設計「One Shall Stand」首領殲滅戰、「Control Point」控制權爭奪戰和「Battle for Shard」搶旗戰。例如首領殲滅戰就要搵人扮演柯柏文（博派）或麥加登（狂派），當打爆對方首領就為之勝出；而小記則較喜愛搶旗模式，學足電影分成兩派爭奪能量火種，邊個拎住能量火種實被人追着來打，夠晒過癮。

遊戲資料

平台：Xbox 360

類型：動作冒險

人數：1~8人

推出日期：已推出

網址：www.transformersgame.com

售價：$329

撰文、部分攝影：鍾鎮科

查詢電話：2481 6693