今年5歲的王綽枬（Cody）一出世就成為主角，每天都有人陪玩、陪笑、陪讀書，邊個咁抵得諗？當然係孩子的爹哋媽咪—王書麒、許秋怡啦！不要以為做孩子的「跟班」好Easy，少一點細心、耐性也不行，難得兩位大忙人依然勝任有餘，一句講晒：「事在人為！」

工作不忘親子

書麒哥哥、秋怡姐姐都曾經成為鎂光燈下的主角，但自從合組王氏家族，兩口子都甘願當上綠葉，最緊要小主角——Cody開心就乜都得！

眾所周知，書麒做事一向認真，身為電台節目主持人，每次開咪都做足功課，經常捱到三更夜半；身為藝人的秋怡，同樣為工作日夜顛倒，不過兩人有着共識，無論工作多忙碌，一定會預留親子時間，一家三口共享家庭樂。書麒說：「每晚替Cody沖涼，就係我哋兩父子盡訴心中情嘅時間，開心、唔開心都會傾一大餐。如果囝囝當日犯了錯，我仲會藉此機會來個檢討，交流彼此嘅睇法，就好似朋友聊天一樣。」

Cody討人喜愛，不少親朋都愛送他玩具，有次書麒說要買玩具作獎勵，Cody竟然說：「唔使買，屋企啲玩具夠我玩喇！」年紀輕輕已明白知足之道，抵讚！

書麒、秋怡和囝囝Cody喜以踩單車、踢足球維繫感情。

煲粥維繫感情

書麒坦言，要增長親子感情，時間長短不是關鍵，最緊要父母肯交個心出來。好像媽咪秋怡，雖然不時到外地登台，但身在異地心在家，一有空即跟囝囝越洋通電。「每次身在外地，我都會同囝囝煲吓電話粥，天南地北乜都講。我認為，開放、舒服嘅溝通模式要由細開始，仔女日後才懂得跟你有商有量。」不說不知，秋怡兩母子好喜歡以Memo通訊，訪問前數天，Cody便寫了一張「Cody love媽媽」的字條，好Sweet呢！

訪問期間，Cody跟爹哋媽咪玩到癲，親子關係有幾Close可想而知。	放大圖片	放大圖片
雖然只是一張Memo，但足以令Cody和媽咪的心連在一起。

疼愛不等如溺愛

雖然書麒、秋怡十分痛錫Cody，但不等如要對他千依百順。「家陣啲小朋友太幸福了，我哋唔想Cody畀物質沖昏頭腦，所以平時嘅活動都係踢波、踩單車之類，簡簡單單，令他明白知足常樂嘅道理。此外，由於屋企附近多花草樹木，有時我哋會就地取材，同囝囝上吓自然課，講吓蝴蝶、螳螂等『飛禽走獸』。其實同仔女玩係父母的責任，總比送遊戲機作補償來得有意義！」

撰文：楊芷穎 攝影：陳富權