【駐澳門記者】何超雲前晚陪同父親何鴻燊到澳門出席哥哥何猷龍的「新濠天地」開幕晚宴，一眾名人霍氏兄弟、蔡志明、潘楚穎等盛裝到賀，賭王大讚愛兒叻仔，感到十分滿意。

是次投資賭場酒店何猷龍花了21億、籌備五年才開業，他不敢做新賭王︰「我爸爸先係賭王，我都唔知自己賭乜！大家各有各做，有佢十分之一咁成功已經好叻。爸爸咁多年都好支持我，畀咗好多建議我，好多謝佢。（父親節點慶祝？）搞掂呢度先。」至於造人大計，他說搞完一樣先一樣。

何超雲昨日陪父親何鴻燊入馬場，她拿了千元大鈔落注！	梁安琪	何猷龍與太太羅秀茵盛裝出現。
左起：前晚超雲與父親何鴻燊及哥哥何猷龍出席「新濠天地」開幕晚宴。	潘楚穎亦到場開眼界。	蔡志明（中）帶同女兒蔡加怡及兒子蔡加讚赴會。

昨日，超雲則以一身紅衣銷魂look陪父入沙田馬場欣賞「港大校友會盃」，她在沙圈與友人研究馬匹，並拿出一千元讓對方代買馬，她說︰「我有買馬不過輸咗，我冇咩賭運，爸爸都有買，佢畀咗佢張飛我。」昨日父親節，超雲送了數條領呔給爸爸，但不及哥哥何猷龍送的眼鏡好看，指爸爸戴起好靚好型，問她想不想找個像哥哥般孝順又專一的男朋友？她說：「梗係想！但係呢啲好男人絕晒種。」正在放暑假的她，有意打暑期工，但未知幹哪行。