即將生日的任賢齊（小齊）昨日出席活動時，被名模Ana R.送上波餅之餘，又送上birthday kiss，他坦言女友不會呷醋。而被問到女友會否送BB作生日禮物？他即時耍手擰頭，高呼怕怕！

昨日小齊與Ana R.化身鐵騎士出席Kiehl's發布會，為的是喚起公眾對地中海貧血症兒童的關注，二人還即場捐出港幣一千元，其後二人坐上珍藏版的Harley Davidson 100周年特別版電單車合照時，表現風騷的Ana R.為小齊送上波餅。期間在場小齊fans突然高唱生日歌及送上蛋糕，Ana R.見狀即送上birthday kiss。

二人坐上珍藏版的電單車合照時，Ana R.為小齊送上波餅。	在場fans為小齊高唱生日歌及送上蛋糕。	Ana R.表示家人雖然曾多次結婚，但自己只想結一次。

大女親自整卡

其後小齊被問Ana R.送上波餅，女友會否呷醋？他說︰「唔會！我同Ana R.之前都識，同佢合作過拍MV。（食波餅尷尬？）都唔會！」他又表示本月廿三日才是他正日生日，到時或許在工作中度過，而大女會親手製作生日卡給他︰「佢成日都整卡畀我，好得意，我每一張都會收藏！（女友會唔會又送BB畀你？）唔好，太驚喜啦！」他續說︰「雖然我鍾意小朋友，但為工作冇時間照顧佢哋，佢哋大得好快，睇番佢哋以前啲相，我錯過佢哋嘅成長過程，真係好遺憾。」

Ana R.想生五個

另邊廂的Ana R.表示早前撞車的父母身體情況已好轉，但為求安心，每日或隔日都會致電他們，更打算下月回美探望他們。當記者問她何時結婚？她說︰「我諗仲好長遠，我要拍拖一段時間，觀察究竟係咪合適先結婚。何況我媽咪結過三次、細佬兩次，我只想結一次。（會唔會生？）我好鍾意小朋友，希望可以生五個，但養一個要好多錢，所以我要努力搵錢！」記者建議她不如嫁個有錢人？她表示真愛才重要。

文︰名人組