近日於劇集《ID精英》中飾演郭晉安兒子的譚真一，年僅5歲已才藝出眾，原來是家燕姐的徒弟，受過專人訓練，難怪自信心爆棚。童星出身的家燕姐認為，練唱歌、學跳舞，可讓孩子的情緒、精力得到宣洩，更有助啟發多元潛能呢！

學演藝建立自信

「自己都做過童星，細細個已學做戲、學歌舞，呢啲經驗對於小朋友嘅成長好有用。好似大女祐珊，自小已接受演藝訓練，我唔係要佢做藝人，只係希望佢能夠培養多啲唔同方面嘅興趣，而且唱歌、跳舞係紓緩壓力、抒發情緒嘅渠道，更可提升個人嘅自信心，到日後待人處事也能從容面對，所以就算囡囡冇打算做幕前工作，我都唔覺得嘥咗之前嘅訓練。」

04年家燕姐決定將自己的教女心得發揚光大，開辦「家燕媽媽藝術中心」，透過一系列演藝訓練，作育英才。

放大圖片	放大圖片	受過訓練的真一，表情多多，自信爆棚。
學員陳靖琳（前）只有8歲大，卻有豐富的演出經驗，曾於《師奶股神》中飾演商天娥女兒，現時則主持《放學ICU》節目。

辦課程實用行先

除了歌唱、舞蹈、演戲、配音等元素，家燕姐的演藝學堂更提供英語棟篤笑、未來領袖訓練等。

「課程設計最緊要實用，例如今個暑期將開辦英語棟篤笑課程，小朋友可以趁機鍛煉口才、急智，展現幽默感，同時可學好英語，一舉多得。另一個名為『打做21世紀未來領袖』——從小學開始的課程，則巧妙地將九型性格分析融入話劇，令小朋友喺輕鬆嘅氣氛下，體會不同性格嘅特點，從而學會包容、欣賞及鼓勵其他人，為將來的發展奠定重要基石。」

中心邀得一班星級導師提供歌、影、視培訓，包括著名導演李力持。	「英語棟篤笑」旨在培養孩子講說話的幽默感，家燕姐與真一的鬼馬表情就是最佳示範。	「打做21世紀未來領袖」——從小學開始的課程，將藉着話劇形式分析九型性格的特點。

共患難親子更Close

早前家燕姐患了一場大病，感覺如死過翻生，令她更珍惜與子女相處的日子。現時大女祐珊已成為媽咪的得力助手，負責打理藝術中心的業務，兩母女互相扶持，關係親密。「講真，我啲管教方法都冇乜特別，但會喺仔女成長嘅過程中不斷學習，緊貼佢哋嘅步伐，又會聽吓其他家長嘅意見。其實最緊要爭取多啲機會溝通，畀多啲關懷，仔女自然能夠感受到家長嘅支持，千祈唔好怕有摩擦而唔出聲！家陣我正籌備灌錄一首名為《弟子規》嘅兒歌，希望藉着孔子嘅教誨，令小朋友學識如何做人處世、尊重長輩。」

家燕媽媽藝術中心

網址：www.motherhongkong.com.hk

查詢電話：2342 7782

撰文：司徒德琳

攝影：郭凱敏