跟周中師傅殺到檳城搵食，竟然發現佢最鍾意「揼波波」！大家別誤會師傅好色，只係用福建話講價啫。在城中最旺的新關仔角大牌檔，實行火裏火裏去，食盡亞參喇沙、羅吔、炒粿條等著名小食，期間跟住師傅周圍去揼波、揼波波……總之，記住周中話：「一句揼波波，馬拉通行」，爽呀！

食嘢講價 慳番唔少

新關仔角位於檳城東北面，是城中最有名的消夜大牌檔，多達一百個小食檔，煎炒煮炸樣樣齊，在眼闊肚窄的情況下，好彩有周中師傅指點迷津，一坐低就幫我們叫滿成枱美食，不過佢話識食係其次，最緊要係識「揼波波」，齊齊學「周中版福建話」：「At size巴li揼波波？巴li揼波揼波！」，意思就係：「好貴喎？再平啲啦！」，只見他這邊揼波波，那邊又揼波波，每碟平少少，為大家慳得一蚊得一蚊，果然使得喎！

師傅仲話蝦膏醬係馬拉小食的靈魂，很多食物本身淡而無味，就是靠醬料搭夠，豬腸粉加蝦膏同甜醬，由木瓜、杧果、石榴油及油炸鬼等製成的羅吔沙律又加蝦醬，鹹鹹甜甜的，夠晒惹味。多款美食之中，師傅最欣賞檳城獨有的亞參喇沙，他說：「亞參本身是香料，形狀像炸菜，味道偏酸，而湯底除了亞參，還有池魚肉、喇沙葉、辣椒、蒜蓉及酸子皮熬製而成，好醒胃㗎！」橙紅色重魚香的湯底，酸辣又開胃，記住要落埋附上的蝦膏醬，吊出鹹香鮮味，好味到師傅連湯都飲埋。

新關仔角大牌檔

地　　址：182, Gurney Drive,Penang

營業時間：7:00pm~12:00mn

周中師傅又出動嘞！在攤檔前偷師之餘又幫我們「揼波波」。	炒粿條夠鑊氣，材料豐富，有芽菜、雞蛋、蝦粒等，河粉又夠滑，好味道！RM$3.5起（約HK$7.7）。	亞參喇沙即叫即煮，看到老闆娘煮到香噴噴，立即叫番碗。
檳城獨有亞參喇沙味道偏酸，而且有蝦醬，味道跟咖喱湯底的大大不同，RM$3起（約HK$6.6）。	常見馬拉菜中加入鮮蛤，這裏滾熟即可進食，十分鮮味，RM$3起（約HK$6.6）。	串燒即場用炭燒，不但熱辣辣，而且價錢超平，只是RM$0.6（約HK$1.3）一串，牛雞任揀。
這裏沒有榴槤之王，將就一下食住葫蘆品種先啦！你見模特兒Carmen食到如此冧，就知道質素唔差，RM$8起（約HK$17.6）。	羅吔是馬拉人的沙律，有生木瓜、杧果、石榴油及油炸鬼，酸酸甜甜很開胃，RM$3.5（約HK$7.7）。	馬拉小食最重要是醬料，當中不可缺少濃郁的蝦膏醬。
一百幾十蚊港元就食到飽一飽，你睇師傅個樣幾得戚！

失傳娘惹糕 自家鮮製

娘惹糕是用上馬拉椰醬及中國米粉製成的Fusion甜品，現在已買少見少。其中Bak Hong Geok的老闆，仍堅持每天在屋企自製糕點，只批發給五星級酒店，今次跟周中同行才有機會見識到。只見他急不及待走入廚房偷師，看到大蒸爐時揭開看看，轉頭又伸手試人家的咖央醬，認真百厭。

老闆莫生說因為糕點製作過程複雜，懂得製作的人已經不多，好像粉紅色白間的九層糕，要等一層蒸好放涼才可以放另一層，很花時間及工夫，另外呈藍色的青米糕，原來是糯米加入政府批准的食用色素染成，在上面加層咖央醬，一鹹一甜，口感豐富，而其他款式例如木薯糕、汾糕、班蘭糕等多是甜點，周中話：「甜係冧死人，不過男人都係鍾意鹹……味多啲！」

Bak Hong Geok

地址：39 Jalan Trang, Penang

每天莫生莫太在家中自製傳統娘惹糕，我們更有得試食添。

五顏六色是娘惹糕的特點，有九層糕、木薯糕、汾糕、班蘭糕等。

檳城必買 極香麻油

要在檳城買特色手信，周中推介麻油！你可能話山長水遠來買麻油？冇錯，義香的麻油是全城最出名的，就連蘇施黃都指定用這款，每次來到必定大量入貨，原來義香利用品種最好的芝麻來研製，香味特濃，更標榜營養豐富，不含人造色素，除了蛋白質、維他命B、E外，更含有Omega 3及6，有助心臟健康咁巴閉，不過計我話，夠香已經贏晒啦！

此外，店中小豆沙餅及香餅，亦是檳城名產，超鬆化的外層酥皮，包着香甜的綠豆或是紅豆餡料，細細個，一口剛剛好，不禁食完一個又一個，最緊要價錢夠便宜，大大盒都係港幣十多元，買多幾盒都唔會肉痛！

義香手信店

地址：216 Jalan Macalister, Penang

你話食手指好味啲，定係食小豆沙餅好味啲呢？	小豆沙餅有綠豆蓉做餡料，外層超鬆化，RM$5.5起/16個（約HK$12.1）。	傳說中的麻油之王，試過用來送公仔麵，真的無敵，RM$8.8起（約HK$19.3）。

遨遊備忘

簽　證：持BNO或特區護照均毋須簽證

貨　幣：RM1約兌HK$2.2

天　氣：6月氣溫約24℃~33℃

機　票：乘坐馬來西亞航空來回香港至吉隆坡經濟客位機票約$1,310起（二人同行）

旅行團：永安旅遊周中師傅馬來西亞美食5天之旅（PEN05X）， 7月14日出發，$4,999起。

查詢：2928 8882

特派記者：羅安琪

鳴謝︰永安旅遊、Discover Orient Holidays Snd Bhd