如果你去日本會捐窿捐罅的話，你應該知道竹下通、涉谷、下北澤，有一間叫做大中的潮流雜貨店，這間店沒有特別豪華裝修，亦沒有睇你唔起的售貨員，如果要形容這間店，我會用一個字：亂！

雖然是亂七八糟，不過，最潮最新最興的潮物，一定會放在門口位，而早在上一年，這個店的門口都是放滿了不同款式的塑膠鞋，無錯！係你呀媽做女嗰陣時的塑膠鞋，又或者是《表姐你好嘢》入面，DoDo姐着住嗰對，娘到喊老套到爆嘅膠鞋，家陣又興番啦！

今年春夏季，無論是高跟鞋平底鞋定涼鞋都一定是膠膠哋，你唔信？哈！我話畀大家知，連飛甩雞毛，今年都出咗一對平底膠鞋，雖然話就話是塑膠鞋，不過手工一點都不馬虎，鞋頭仲有一個的的骰骰蝴蝶結，都是千多蚊，值得投資，比起飛甩雞毛的皮鞋來說，已經平咗一半有多！

不過，如果你會去日本的話，我建議你可以去一轉大中睇一吓，因為如果我無記錯，大中賣緊的膠鞋都是千多蚊，不過是日圓千多蚊！抵玩！買番屋企擺都抵！

時裝設計師