等咗足足10年，Konami終於推出第一隻有中文歌嘅「跳舞機」遊戲「Dance Dance Revolution Universe 3」（DDRU3），加入咗包括粵語同國語歌共20首，本地歌就有一眾英皇群星如Joey、Twins、霆鋒嘅歌曲，而國語歌方面則有蔡依林、棒棒堂等，牌面唔弱，值得趁夏天在屋企跳舞消脂！
撰文、攝影：布偉倫 查詢電話：2725 3338
廿首中文歌任跳
「DDRU3」總共收錄80首歌曲，當中20首係華語歌，比例都唔少，不過唔知係因為開發時間嘅問題，抑或係版權關係，收錄嘅中文歌唔算新，但都有一定可玩性。「DDRU3」本身已經跟埋跳舞氈，將跳舞氈以USB接上Xbox 360主機就玩得，玩法係跟住畫面上的「←↓↑→」夾啱Timing踩番相應的箭嘴，只要花少少時間操熟都唔難適應。
賺錢買閃閃戰衣
單打時，可以逐首歌慢慢練外，仲可以入故事模式跳贏電腦角色賺錢買Bling Bling戰衣；不過更好玩係對打模式，除咗一般鬥跳外，仲有唔少特別模式。如雙打時可玩Attack模式靠Combo將對方的方向顯示棒壓低，或者玩Bomb模式用炸彈炸死對方。遊戲最多可以對應4人連線對打，最好就係有齊4張跳舞氈，齊齊舞動全屋！