近期Game場雖然交投淡靜，但係都有唔少場內人士睇好「inFAMOUS」，今次擁有超能力嘅主角棄用真槍實彈，全程都係靠放電電人，冇電仲要搵充電站去充番滿，玩落都幾搞笑！而且玩家可隨時正邪兩邊走，做好人打壞蛋又得，做壞人打低走緊難嘅居民都得，勁爽！
撰文：布偉倫
搵電力站充電
「inFAMOUS」故事好有美式英雄漫畫嘅感覺（過場動畫都用上美式漫畫風格），內容講身為速遞員嘅Cole送貨時突然遇到爆炸，之後就擁有放電嘅超能力，但唔好彩被標籤做爆炸元兇，遊戲目標當然係想洗脫嫌疑同解開一切謎團；而背景城市Empire City用上近未來背景，感覺都特別啲。據開發小組所講，因為現今城市好依靠電力，所以將主角設計成擁有放電嘅超能力，但係又唔似英雄漫畫咁電力用之不盡，主角冇電時係要搵路邊嘅電力站充電。可能平時玩得太多用真槍實彈嘅遊戲，「inFAMOUS」呢招放電、充電又真係幾使得。
無間道任你扮
遊戲設計並唔係以直線進行，在Empire City內可以隨心所欲做自己想做嘅事，甚至連做好人或者壞人都有得揀，即係遊戲標題所講嘅「Famous」同「Infamous」，有名或者聲名狼藉。遊戲開始冇耐當主角完成一個簡單任務後，會見到成班居民執食物，假如放電電佢哋就會變成壞人，相反就係好人，不過呢種試探在遊戲中實在太多，搞到小記都忍唔住放電電吓啲走難嘅居民。主角成為好人或壞人後，居民對你嘅反應都會唔同，任務亦有改變，自由度比單單在城市內任走任打更好。而無論好人定壞人，只要做得好都可以增加名聲，仲可以買唔同嘅招式同道具。要分辨到底玩家係好係壞都好容易，放藍光時就係好人，放紅光就係壞蛋。
中文字幕更易玩
玩「inFAMOUS」時嘅感覺，就好似玩緊「GTA」加上「蜘蛛俠」，主角識爬牆同遠距離跳躍，跳躍時放電亦好似蜘蛛俠。但係要留意主角並非不死，失足從高樓跌落街、跌落海或者中彈、中毒氣都係會死；如果畫面突然轉成黑白，唔好以為係電視機出問題，而係主角受重傷，但只要好似玩射擊遊戲咁停低唔郁，角色就會自動補血。不過奇就奇在，主角放電都會好似射擊遊戲咁出現「Head Shot」，睇嚟開發小組好有心吸納一班玩開射擊遊戲嘅玩家。
遊戲資料
類 型：動作冒險
開 發：Sucket Punch Productions/SCEA
平 台：PS3
推出日期：5月28日
售 價：$358
網 址：http://asia.playstation.com/