這個5月流感肆虐加漒水炸街，搞到香港人驚到唔願出街晚晚返歸電視撈飯。適逢端午臨近，坊間出現不少變「糉」美食，其美味及驚喜絕對會人傳人，就連Adam鄭同謎女郎都解唔開呢個變「糉」之謎！
撰文：黎家榮、陳嘉勵
攝影：方偉堅（部分）
查詢電話：（a） 2739 1328、（b） 2806 4918、（c） 2628 0989、
（d） 2710 1093、（e） 2315 1006、（f） 2731 2883、
（g） 2376 2882、（h） 2622 6161、（i）2101 1333、
（j） 2593 8801
新奇品糉變得神奇
「變種」即品種異變，H1N1流感之所以咁恐怖，就係因為經過變種！而今次嘅「變糉」，就由以往嘅梘水糉、鹹肉糉及裹蒸糉等異變而成，好似梘水糉竟然好似心太軟咁有朱古力漿流出、鹹肉糉嘅餡料竟會變成咖喱肉醬，而有助於炎夏除去悶膩嘅蟲草花都竟然喺糉度出現。究竟點解佢哋會變得咁好食？呢個的確係個謎！
咖喱肉醬糉$38（a）
日本咖喱甜多過辣，配上肉碎、原粒栗子及芝士等，充滿和風惹味十足。
蟲草花水鴨糉 $48（c）
鴻星今年新出品，以人工培植蟲草花及微寒、無毒的水鴨，並加入山藥、薏米、淮山及杞子等材料，水鴨利水消腫，蟲草花有助於炎夏除去悶膩，配合香軟糯米不油不膩，芳香濃郁。
帝皇裹蒸糉 $78（d）
逸東酒店逸東軒選用上乘鮑魚、瑤柱、北菇、海參、魚翅等名貴材料，加上惹味燒鵝做出與別不同的裹蒸糉，令人回味無窮。
梅菜鹹肉糉 $68/2隻（e）
金域假日酒店龍苑中菜廳推出的新口味，在傳統鹹肉糉內添加梅菜和綠豆肉，配合鹹蛋黃及豬肉，香濃而不膩，是愛好傳統口味人士的另類選擇。
食足七日 貴價變糉
遇上變種流感，你要隔離七日。而遇上變種貴價糉，睇怕你都要食足七日，皆因糉內餡料唔單止豐富，而且夠豪，除咗有松茸、有機紅豆、XO醬等外，就連鮑魚同鵝肝都有埋。咁豪咁好味，真係一星期食足七日都唔嫌多。
鮑魚姬松茸糉 $98 （g）
翠亨邨以原隻南非鮑魚及雲南野生姬松茸釀入糉內，配搭雲南頭菜、有機紅豆、腩仔肉及招牌XO醬，提升食味層次。
一品鵝肝糉 $198 （f）
海景嘉福酒店海景軒，以足四両鵝肝略煎後釀入糯米，配合栗子、綠豆及肥肉等材料，糯米吸盡鵝肝的精華，甘香無比。
如膠似漆甜蜜變糉
有人話呢個世界最難解釋嘅就係愛情，點解突然會愛，突然間又唔愛。就好似端午節啲糉咁，無啦啦又會變咗甜品。其實糉同愛都一樣，啱你口味嘅咪攞去囉，唔啱嘅都冇人會逼你，梗有人會鍾意食而攞起佢。係咪愈睇愈謎呢？簡單講句：覺得啱嘅就放膽去食。
黑糖紫薯糉 $48（h）
帝京酒店帝京軒選用含豐富礦物質的黑糖，及來自日本、含有亞油酸及纖維素的紫番薯，兩種材料混合而產生獨特的甜香，甜美而健康。
甜心冰糉 $50/盒（三款）（i）
美心的冰糉外形與口味獨特，奶黃冰糉更是今年新口味。外層通透口感煙韌，清新宜人，食一啖甜到入心。
蜜棗綠茶豆沙糉 $9.5（j）
五豐行今年以嘉興糉作主打，蜜棗綠茶豆沙糉以珍珠糯米配搭上等蜜棗和豆沙，再加入綠茶粉令色澤獨特，味道清香甘甜。