近期靚模湧現本港模界，十足日本妹一樣「卡娃兒」的Angelababy、Kama和諸葛梓岐，闖出名堂之餘更進軍日本市場，可見日系少女look的受歡迎程度和煞食指數之高，在今個夏天定必大行其道。
要打造充滿日本味道的少女妝容，色彩鮮艷奪目的妝物絕對是必須。不過別以為夠sharp夠繽紛就可以隨意配搭，一定要「色」得其所，萬一襯錯色整個妝容就不夠Kawaii（可愛）。
眼線宜重手
經常為佘詩曼、胡杏兒、Amanda S.、Janice Man及李珊珊等女星化妝的專業化妝師Chris Lam就教大家怎樣善用GIFFARINE新出的妝物，去塑造出今夏熱爆的粉紅色系甜美日本美少女look：「今季粉紅色備受追捧，好多人都驚呢隻色會令到對眼比較浮腫，所以化眼妝時，眼線方面可以重手啲，加深同突出眼部輪廓，同埋仲可以用假眼睫毛，營造一對好似公仔咁迷人嘅大眼睛。掃粉紅色眼影時淡淡哋就可以，胭脂同唇膏嘅粉紅色就可以重番啲，整個妝容都用同一色調，唔使驚話會好俗，只要濃淡得宜，咁樣就會帶出嗰種甜美俏麗嘅感覺。亂襯色就好易出事。」
少女味濃厚
而梁嘉琪亦大讚這個可愛粉紅妝：「好鍾意呢個妝，化完即刻成個少女晒，我自己唔敢用咁多粉紅色喺面度，驚好腫，但係Chris同我化嘅妝就完全冇呢個問題，好sweet好有少女feel。」
採訪：張嘉敏
攝影：司徒國榮
化妝：Chris Lam