陳刀台戲:BYOB

我相信同我差不多年紀的朋友,都應該記得早在很多年前,政府曾經推出過一系列宣傳去教育我們,BYOB (Bring your own bag/自備購物袋),不過當年應該無人因為這一系列的政府宣傳而自備購物袋,很悲哀!原因是政府搞到自備購物袋是一件老套得不得了的事,BYOB?會唔會太娘呀?都唔知邊個度條咁娘的橋出嚟?

講真,這陣子,唔知點解突然間自發地自備購物袋,可能是因為我覺得去超級市場買嘢唔要膠袋好有型,認真的,當你發覺身邊的師奶買少少嘢都抽住四五個膠袋,你就會覺得自己買咁多嘢,都只是用一個環保購物袋已經裝得晒嘅時候,原來你一個布袋等於師奶四個膠袋……你就會有種飄飄然的優越感,而這個優越感的背後,是你覺得自己做啱咗!因為原來我們真的太唔環保……如果有一日地球真係滅亡的話,其實原來你同我都是有份破壞的一分子。你無?你唔係?請不要抵賴,你睇吓你廚房個灶底同櫃桶入面有幾多個膠袋先講。

認真的,自備購物袋已經是一個潮流,唔信的話,你不妨望吓買嘢唔要膠袋係咩人多?係潮人!一齊做個自備購物袋的潮人啦!

時裝設計師

陳刀