英皇小天后泳兒與勁舞歌手海鳴威，原本身處天南地北的兩個歌手，全因一首獨唱歌《我的回憶不是我的》而被緣分拉在一起，雙語溫馨對唱，唱活「我的回憶都是我們的」。
泳：泳兒 海：海鳴威
泳兒與海鳴威同樣在歌唱比賽中勇奪亞軍，而進身娛樂圈，不過海鳴威的星途相比於泳兒，就顯得荊棘滿途。
海：你第一次見到我嘅時候，印象係點㗎？
泳：哈哈哈，個樣好似張家輝囉，相信我都唔係第一個有咁嘅感覺，真係好似，不過喺見到你之前，都有聽過同事講有關於你嘅事，知道你唱得跳得，仲識創作，一出道就已經被內地傳媒封為「中國舞王」，其實你嘅舞藝咁厲害，係點樣鍛煉得嚟㗎？
吃盡苦頭曾瞓街
海：「中國舞王」呢個美譽係我目標，仲有好多進步空間，講到舞藝，其實自己好細個嘅時候已經鍾意跳舞唱歌，跟住錄影帶學，初中畢業之後，就轉咗去深圳學跳舞兼登台表演，其後為咗希望可以喺更大舞台上演出，就膽粗粗一個人去咗北京，嗰段日子真係好苦，試過向各大小酒廊自薦，捱過唔少苦頭，住過地下室，仲曾經露宿街頭。
泳：嘩！咁咪好辛苦？咁最後又點解會去咗參加歌唱比賽嘅？
多得學友點迷津
海：咁就要多謝張學友，記得喺○三年得到學友經理人陳淑芬賞識，邀請參演《雪狼湖》，當時跟住學友去咗唔少地方演出，喺學友身上除咗學識唱歌技巧，仲有處世之道，學友教我做人一定要堅定，又鼓勵我參加比賽，雖然比賽期間壓力唔小，仲受過傷，不過我已經知道凡事未必可以一帆風順，我對自己講，為咗理想一定要堅持。
深情對唱踩住上
由一首情歌《我的回憶不是我的》撮合，泳兒與海鳴威在ＭＶ中深情對唱，演繹出幕幕動人片段，雖然鏡頭前兩人甜到漏，但原來鏡頭後，隱藏不少不為人知的趣事！
泳：ＭＶ裏面導演要我成個人踩上阿海腳上面，我第一個反應係會唔會踩死佢，而且又要面對面好近咁對住，真係有啲尷尬，好彩導演係想要一種怕醜嘅感覺，所以效果出嚟，大家都好滿意，其實我當時有冇踩親你呀？
海：有呀，你都幾重㗎！哈哈，講笑啫，還好啦，不過真係有啲尷尬，始終當時唔係好熟，整個合作前前後後用咗好短時間就完成，大家都冇乜時間真正溝通過，依家就唔同喇，嚟香港宣傳，日日都可以對住泳兒！
泳：咁你鍾唔鍾意香港呢個地方呀？
樂於做導遊
海：鍾意呀，自己係廣州人，成長環境同香港都好似，之後會多啲嚟香港宣傳，希望可以同更多唔同嘅香港歌手合作，你會唔會做我導遊呀？
泳：哈哈，成日都要對住我，你唔嫌悶，咁我又有乜所謂，一言為定，要多啲嚟見你嘅香港歌迷喇！
海：一定，一定！
Profile
海鳴威（Ocean）
籍貫：中國廣東
出生：1982年7月10日
專長：舞蹈、唱歌、騎馬、跆拳道
舞台經歷：2006CCTV-2夢想中國亞軍、2005張學友音樂劇《雪狼湖》的特邀藝員、2002全國街舞大賽冠軍、北京電視台模仿秀冠軍、2000《新偶像》歌唱比賽冠軍
採訪：音樂組
髮型：Ziv Yeung@ Orient 4
化妝：Cyrus Lee@ Beauty Tech
服裝：Bauhaus（泳兒）
場地：Facet Bar@Lobby（棉登徑）