我自己是一個甜品怪，超級鍾意食甜品，如果你問我香港邊度有好味的甜品，我真係可以話畀你知，有好多，隨口噏都噏到有十間八間，誇張！大坑的小甜谷，荔枝奶凍，天后的甜姨姨，芝麻豆腐杯，西灣河明記，鮮雜果西米露，將軍澳聰嫂，兒童樂園，等等等等，間間都有自己的特色招牌甜品，諗起都流晒口水……
不過人就係咁架啦！當你食得呢間多幾次呢，你唔係食厭咗，不過好似想試啲新嘢咁，人是貪得無厭架，好真實！所以昨晚，就跟朋友去咗一間新開的甜品舖去試新嘢啦！今次呢間甜品舖叫甜嫂，唔明點解甜品舖嘅名總係要有女性親戚的稱呼？男性親戚又唔得嘅？好似甜舅父甜姐夫又得唔得呢？唔知呀！
講番甜嫂啲甜品先，當中有一個不能不提不能不試，必食的楊枝甘露芒果布甸，食到個人真係癲咗！好味到呢……真係你想像唔到咁好味！首先分量是一家四口的分量啦！第二是芒果布甸同楊枝甘露都是好濃味唔係淡茂茂，第三最緊要是有好多西柚肉喺入面，超正！
大家如果好新嘢的話可以去試一吓！
時裝設計師