眨吓眼，海洋公園新景點《亞洲動物天地》即將開幕，如果你都同樣鍾意動物，夢想有個私人動物園，唔使羨慕，即刻動手「建造」，仲可以有齊海陸空動物添！吓，落成地點竟然係屋企個廚房？！
撰文：楊淑英 攝影：陳世昌、梁偉德、胡淑儀
形態渾然天成
你無睇錯，皆因飛禽走獸，甚至海中霸王都係廚具，仲要精美、實用兼備，想擁有非常容易。品牌Animal House推出的廚具系列，最吸引大家應該係造型像真，設計師根據動物形態而設計，好似雀仔個嘴會變成鉸剪、削皮器；鯊口則是開瓶器；又或是八爪魚觸鬚、箭豬的刺都成了刷子，將外形、功能結合，感覺渾然天成。
設計細緻貼心
廚具造型靚，當做擺設亦可點綴屋企，但講到功能性，這批動物亦絕不失禮，並非只靠個樣。先講用料方面，其中削皮器、麵包刀及芝士刨等，均以不銹鋼製造，使用時非常流暢，而鉸剪、刀更加有塑膠握位，不怕滑手弄傷自己，而雀仔鉸剪更附有安全鎖，令用家特別安心。值得一提，不少產品都可放在洗碗碟機內清洗，夠晒衞生。
1.啄木鳥鉸剪 $100
只要按下雀尾的安全鎖，佢就會張開嘴及翅膀，為大家服務，如果有埋叫聲仲好……
2.雀仔蔬果削皮器 $60
相比「啄木鳥」個樣，呢隻雀就略為文靜。皆因合埋個嘴主力削皮：甘筍、梨、青瓜等等，話咁快就得，果真無聲勝有聲。
3.馬騮仔削皮器 $50
雖似馬騮仔平時攀樹個樣，但今次樹枝變成削皮器，將蔬果皮削到乾乾淨淨，其中右手凸出部分，更可挖去薯仔上的小凹洞，馬騮仔玩得開心又有貢獻，幾好。
4.鯊魚小刀 $60
細細條鯊魚於刀鋒有樣你睇，一改平日對牠的壞印象，背部特別附有塑膠位，使用時不怕滑手。
5.鯨魚雪糕勺 $100
這鯨魚絕非血肉之軀，係由矽膠及不銹鋼製造，感覺墜手，但用來對付硬冰冰的雪糕，一流！
6.八爪魚洗碗刷 $50
八爪魚習慣水中生活，畀佢負責洗碗就最適合。頭部扭開可放入清潔劑，使用時只要按幾下，便會流到雙色刷毛上，開始清潔大行動。
7.鯊魚開瓶器 $60
鯊口長滿鋒利牙齒，一咬到後果好嚴重，你睇樽裝飲品就畀佢咬甩咗個蓋！
8.劍魚麵包刀 $80
老實講，以前小記對劍魚嘴的用途不甚清楚，依家就知原來係用嚟切麵包，握緊灰色塑膠部分，輕易就將香脆百吉包片薄。溫韾提示：小心刀利。
9.老鼠芝士磨 $80
外形有如電腦滑鼠，底部竟是芝士磨，上下推動即可將芝士磨碎，拿開芝士磨竟發現老鼠是個膠盒，附有膠蓋可好好的保存芝士，唔畀老鼠食！
模特兒：Irina、Szwina（Color Zone）
10.箭豬刷 $60
一如產品上介紹，硬刷毛最啱做粗活，例如洗鑊、洗煲底等等，雖然比八爪魚的觸鬚硬，但柔軟度也是OK的，不用擔心會刮花煮食用具，可以大力擦去污漬。
查詢電話：2890 5555