X系列Walkman專業音響出街聽

出街聽歌唔一定要犧牲音質，Sony即將推出一款「專業級」X系列Walkman，首次加入在專業音響出晒名的S-master數碼放大器，以及隔晒周邊噪音的Noise Canceling功能，以後坐巴士都可以有猶如隔聲試音室的享受，加埋即時無線上網搵歌及歌手資料絕技，當下最強MP3機實在當之無愧。

撰文：布偉倫　攝影：胡淑儀

機身設計幾靚，半圓形的Hold鍵既有型又易推。	X系列係首部內置Noise Canceling功能的MP3機。	顯示屏解像度唔算高，但勝在色水靚，睇片、睇MV效果都唔錯。

查詢電話：2345 2966

S-master減低失真

音質有瑕疵是MP3機的通病，所以今次Sony將原來用在專業音響的技術「下放」到Walkman上，定會令樂迷心動。X系列Walkman有兩個型號，分別是內置16GB記憶體的NWZ-X1050同32GB記憶體的NWZ-X1060，兩者分別只係容量，同樣內置S-master數碼放大器同Noise Canceling功能。S-master數碼放大器可以減低數碼音樂失真率，人聲同樂器細節差不多可以百分百還原，再配合DSEE數碼音色處理器、Clear Stereo同Clear Bass，音色更清更靚。

三級除噪功能

在街上聽歌的最大問題是周圍的噪音，將音量校到最大只係搵自己笨，所以Noise Canceling除噪功能就最有用。之前雖也有Walkman附設Noise Canceling功能的耳機，但效果唔算突出，X系列就將Noise Canceling變成播放機的內置功能，仲設有三級強度畀大家選擇，分別為火車/辦公室、巴士及飛機，強度愈強，耳塞型耳機的「吸耳」程度就愈強，初用可能會覺得唔舒服，但小記發覺其隔音效果實在幾好，連攝記在身邊嗌我都聽唔到。

直上YouTube睇片

X系列Walkman還內置Wi-Fi，而且針對樂迷需要加入「相關連結」搜尋功能。當大家在Cafe聽歌的同時接上Wi-Fi，Walkman就會直接幫你提供歌手和歌曲的Yahoo!及YouTube連結，一㩒即搵埋其他相關資料，有新派台歌都可第一時間搵得到，然後在3吋、26萬色彩芒上睇料及睇片。硬要從雞蛋裏挑骨頭的話，可以投訴未有直接上網買埋歌手其他單曲的一條龍服務。