方珈悠（Jaime）最近亮相遊戲節目《掌故王》，她笑稱節目內條條問題都不懂，表現認真麻麻，因為在加拿大長大的她，對香港歷史故事確實一竅不通。不過如果節目裏提供選擇題讓她揀答案，就像薄餅餐廳Zig Zag裏的雙拼薄餅，50-50口味任佢揀，Jaime大概不用像盲頭烏蠅般亂猜，但只怕她心大心細，款款Pizza都想食啫！
雙拼薄餅實食得晒
位於西環的Zig Zag，有個搞鬼中文名叫「食晒」，顧名思義希望個個客人食清枱，但餐牌上有近10款薄餅配料選擇，令個個都三心兩意唔知食乜好。自言患有選擇恐懼症的Jaime，無論食飯定行街購物，往往要由朋友幫自己揸主意，所以餐廳的雙拼薄餅一出，便即時解救如Jaime這種貪心的顧客。顧客挑選口味後，廚師便即時將各種配料灑於薄餅上焗製，兩款口味的配料，在烘焗過程中味道會互相影響，比起分別供應兩塊半邊薄餅更有意想不到的效果。
6款由顧客自由配搭的口味包括番茄芝士、辣肉腸芝士、火腿蘑菇芝士、菠蘿火腿、拿破崙及吞拿魚洋葱芝士，餅底用上以新鮮番茄研磨至果皮都稀爛的鮮茄醬，鮮味十足；負責人建議除了菠蘿火腿之外，其餘口味都可自由拼湊，因為菠蘿火腿的配料質地比其他口味較「濕」，如果與較乾身的配料拼埋，便會令薄餅上的芝士焦香程度不平均。
羅馬白薄餅三芝齊下
餐廳另一主打薄餅是白薄餅（Pizza Bianca），在香港比較少見。白薄餅最早源自意大利首都羅馬，配料只有鹽和橄欖油，最多再加些迷迭香葉；後來薄餅傳至美國東岸，配料加入Mozzarella、Ricotta芝士及蒜蓉、羅勒葉等香料，如今來到香港，餐廳再將口味加以改良，加入雞肉、火腿蘑菇或蝦蘑菇做配料，皆因味道較輕盈，不會蓋過芝士的風頭。有別於一般薄餅店，餐廳用上Mozzarella、Asiago及Parmesan三款芝士來做一個薄餅，分別取其滑溜、味濃及香氣三種優勢。餅底氣孔甚多，令焗起的薄餅側邊脆口，中間鬆軟煙韌，一口咬下便感受到芝士的香味與餅底的鬆軟二合為一，令本身超愛吃薄餅的Jaime大快朵頤。
撰文：陳嘉勵
攝影：林資凱
服裝：Sisley
查詢電話：2886 5004