沒有劇集的入屋洗禮，亦沒有唱片的強勢宣傳，更沒有電影的火熱催谷，憑着一張如陶瓷般的精緻面孔，Angelababy輕易把男男女女迷倒。然而一張美得不現實的面孔，仍是要面對現實中的是非和壓力。
和大部分美女一樣，Angelababy並不以自己的樣貌為榮，不過說她整容，她還是有點生氣，她說︰「都唔知點解會咁講，你覺得我邊度似假呀？最初傳我整容，我經理人仲激氣過我。不過依家都慣啦，佢最搞笑話如果再傳就帶我去照X光證明我係無添加。」
冇諗過赴日發展
傳過整容，之後就是傳不和，初冒起時是與好姊妹Janice Man，再來有Kama，她說︰「事實上我呢排真係好忙，的確係同Janice少聯絡，但友情嘅嘢我哋自己心照。至於Kama，我同佢真係唔熟，如果喺後台見到，佢同我講嘢我一定會答佢，不過如果唔係我就唔敢主動同佢講嘢。依家大家都去日本發展，可能因為咁樣外界會將我哋比較。」
入行數年有今日的成績，Baby坦言沒有刻意經營過，她說︰「我冇諗過會紅，一路都係抱住試下嘅心態，同諗住賺下零用錢。去日本發展亦都唔係我計劃之內，係我經理人叫我去試下，我咁大個女都未去過日本旅行，第一次過去做嘢，我當自己去玩，仲買咗超多嘢返嚟，我同自己講，將來一定要做嘢賺番呢筆錢返嚟。」
工作量增壓力大
工作量愈來愈多，Baby也開始有煩惱，她說︰「依家我開始當呢份工係我嘅職業，壓力就嚟啦，好彩每次我有壓力都同經理人傾，經理人開解完我，都會放我幾日假，畀我同啲朋友去旅行叉電。至於吸毒減壓，我一定唔會試，我身邊都冇呢啲人。而煙仔以前細個貪得意試過，後來覺得自己好唔啱，自此就冇再試啦﹗」
採訪︰楊歡成
攝影︰秦健輝
化妝︰Yanki Choi（Make-up Forever）
髮型︰Carr Cheng（POP Hairdressing）