日前羅凱珊（Kama）於「動漫」商場內睇舖位，雖然不少電車男對女神眼甘甘，她一於少理專心睇靚舖。原來Kama有意做老闆娘，她在日本物色到平靚正飾物，希望在港小試牛刀。
正殺入日本市場的G模Kama，除了發展模特兒事業外，有搵錢頭腦的她正密謀在東京入貨做生意，有錢兩邊賺。
日前Kama被拍到在旺角鬧市出沒，身穿斯文西裝外套的她隻身走進「動漫」商場，即時有不少電車男對她虎視眈眈。
專吼吉舖
Kama一於少理直衝入地庫，只在格仔箱區專心睇「吉箱」的位置及size，逗留十五分鐘後，她轉往上層，對平價「吉舖」甚有興趣，更拿起價格表左睇右睇，然後依依不捨地離去。
記者致電Kama求證時，她大方承認有開舖計劃，並直說：「之前喺日本行街，喺竹下通發現有好幾間細舖仔賣啲平靚正嘅小飾物，所以就即刻諗起香港格仔箱，可能會有機會有生意做。」
日本入貨
她說自己經常飛往日本，一有時間就四處搵「平嘢」，倒不如順勢開間賣東瀛飾物的小店，從中賺一筆。雖然金融海嘯下創業，Kama一樣有信心化危為機，笑着教路：「依家股市似玩過山車，不時大起大跌，所以有錢都未必再買。開舖租金雖然平，但點都有一定風險，所以我就睇埋幾百蚊嘅格仔箱，希望靠自己眼光唔使蝕兼有機會賺。」
文：專案組