絲絲講場：「快樂國家」搞喊飛達顏太

事緣農曆新年期間，佢同老公去「全球最快樂的國家」不丹旅行，Feel吓嗰種自給自足、無欲無求嘅快樂。點知途中有日行山「行成七粒鐘」，加上大風大雪，佢話「辛苦到一個點」！不過最後佢都死頂，捱完全程。

孖老公旅行 唔做新項目

講到孟加拉廠房，顏太話依家已經上咗軌道，第二期廠房今年十月份就完工，佢自己一個月去一次睇吓，日常運作交晒畀員工。顏太開始多番啲私人時間，有人就撩佢搞壇新嘢，但佢即刻耍手擰頭，事關老公會詐型。

佢仲話，今年開始要兌現同老公嘅承諾，每個月陪佢去一次旅行，繼不丹之後，已經定咗嚟緊去印度同日本，結婚幾十年仲咁恩愛，認真令人羨慕！

余絲韻