絲絲講場：兩大交易所啟市鬥閃

小加被集郵 似明星出巡

睇見兩大交易所農曆新年開市儀式都非常熱鬧。港交所嘅新場擠滿二、三百人觀賞舞獅，一身紅噹噹套裝配埋鑽石心口針嘅主席查史美倫仲同醒獅點睛。

做咗九年港交所CEO嘅李小加，原來「吸粉」無數，唔少財金圈人士都趁機會搶住同小加影相「集郵」，成功合照嘅「粉絲」仲興奮到歡呼，唔知以為邊個明星到場添。小加仲自爆，為咗出席上市儀式，專登推遲咗旅行計劃留港㗎。

畀人「集郵」之餘，小加都不忘談及香港好重要嘅新股市場。佢話狗年有兩隻新股印象好深刻，一隻係平安夜上市嘅君實生物（01877），另一隻係年三十掛牌嘅貓眼娛樂（01896）。因為係近年來第一次有新股揀喺呢兩日上市，證明香港市場活力無限咁話喎。

金條擺陣超耀眼

另一邊廂，金銀業貿易場延續一貫傳統「晒冷」，除咗派出一大班財神，現場仲展示出100磚九九金條，重量超過2,670両，價值超過3,300萬元㗎，真係睇到絲絲「眼金金」！

余絲韻