Market Insight：美元轉弱 捧受惠股

從基本面睇，環球投資市場短期變數仍多，好似美國總統「侵侵」雖然已簽署臨時撥款法案，聯邦政府暫時恢復運作，惟其實又只係用拖字訣。另外，市場上周已開始憧憬中美雙方更高級別官員會面，事關貿易戰談判的進展如何，對未來投資氣氛起到極關鍵作用。

至於聯儲局議息，就算暫時見唔到有加息可能（其實上半年隨時唔加），但主席鮑威爾於新聞發布會上會唔會出口術，又係一個變數。故此，在上述眾多不明朗因素影響下，好淡雙方暫時休戰，其實都好正常。

淡友似欲重整旗鼓

如果唔理上述變數，轉睇恒指牛熊街貨分布同人民幣走向，反而另有睇法。先講牛熊證街貨，上周大戶推升恒指到27,500點水平，已殺盡幾浸恒熊重貨區。原以為淡友大幅損手後，農曆新年前可能放軟手腳，豈料最新資料顯示淡友又再重新部署，且將新重貨區移高幾百點，幾乎一直疊到去28,100點水平。

雖然無話重貨區喺邊大戶就一定會趕盡殺絕，但所謂前車可鑑，加埋技術走勢都係配合恒指推上去多，所以就算唔買，暫時都唔係一個好時機去做淡！

投資部署方面，年內炒作美元轉弱的趨勢延續，市場認為中美貿易摩擦對美國經濟之打擊開始浮現。年內美國加息速度或比預期更慢，美匯指數昨日跌到落95.7水平，離岸及在岸人民幣匯價分別漲至6.74及6.73水平。

故此，市場繼續對中資股作重估，金融板塊如內銀及內險當然最受惠，其中內險更同時受惠A股回升及人仔轉穩兩大利好因素，近期見最難炒的中國人壽（02628）係威係勢，就知今轉板塊炒作時間應唔短，繼續逢低吸納，仍有一定值博率。

另外，受惠人仔轉強的行業，還有古勝早前已叫看官不妨順勢追入的中資航空股。押注理由繼續係人仔收入來源，相對「值錢」咗，而背負的美元債務又相對「輕咗」，加上農曆新年出外旅遊旺季，唔係坐高鐵就係坐飛機，相信客運量有一定提升。

招金礦業挑戰阻力

至於三隻中資航空股──東方航空（00670）、中國國航（00753）及南方航空（01055）應該點揀？如果純睇走勢，以東航最落後，加上國航及南航股價均已升至中期阻力位附近，所以睇落以東航較值博，首站目標5.2元，跌穿4.6元止蝕。

另外，受惠美元轉弱，金價近期愈升愈有，上周突破1,300美元後，昨日仍能守穩其上。招金礦業（01818）昨日裂口高開高收，睇勢頭仲有得去，短期挑戰前高位阻力8.35元機會唔細，不妨先落第一注，若破位，再睇情況加唔加注，跌穿10天線7.5元止蝕，目標8.5元。

古勝