絲絲講場：普爾遜謝晒 想轉做家族投資
豬年就到，唔止係絲絲，連「賺錢之神」普爾遜亦重新規劃自己未來，考慮將旗下嘅對沖基金轉為家族投資。簡單嚟講，即係索性只為自己賺錢，佢點解會忽然有呢個想法？
管理資產勁縮75%
十年前普爾遜因沽空次按大賺而聲名大噪，之但係「賺錢之神」家陣早已跌落凡間，佢近年投資表現認真麻麻，連最賺錢對沖基金經理十大都打唔入。
睇見咁，好多外來投資者都已抽身，所以佢基金所管理資產現時有近75至80%都係來自佢本人。據監管機構文件顯示，普爾遜基金管理資產約87億美元，較一一年頂峰時嘅約360億美元（約2,808億港元），足足縮咗75%。
所以普爾遜最近公開話，考慮將佢間基金公司轉為家族投資公司，會喺未來一或兩年作出決定。
冧市打殘唔少大鱷
佢又舉埋國際炒家索羅斯，同埋殿堂級對沖基金經理德魯肯米勒做例子，話佢兩位之前亦一樣決定專注管理個人財富，而索羅斯一一年決定退還外來資本同轉型為家族投資公司嘅時候，索羅斯個人嘅財富佔基金資產90%。
事實上，過去一年亦有幾位知名基金經理決定收山，包括Omega Advisors創辦人Leon Cooperman。Cooperman當時話，市場已被量化交易干擾，好似佢呢種傳統嘅選股投資者今時都好難玩咁話！
余絲韻