絲絲講場：券商免息撐新丁上車 位位兩球
香港樓價貴到癲，早排有研究仲話香港人要唔飲唔食近二十一年先「上到車」，依家即使係大學畢業入到大公司做M.T.（Management Trainee，即管理培訓生），除非有「父幹、母幹」，否則年輕人想買樓，真係得個望字！
大學畢業生返工「免審查」
所以話，如果有公司肯免息借200萬元畀你做首期，係咪好過升職加薪先？講緊嘅係海通國際（00665）為香港員工推出「管理培訓生首次置業貸款資助計劃」，每個合資格員工仲可以免經濟審查，最多申請200萬元嘅免息貸款，用嚟買香港物業，今年二月一日正式生效。
不過，海通講明，呢個計劃係要幫大學畢業即加入公司做M.T.嘅員工，如果離職就要按細則本利歸還。仲有仲有，如果申請後做滿五年先離職嘅員工，仍然可以免息，只需要還本金。
其實尋日朝早金魚缸已經將呢個消息傳到開巷，話整個計劃涉及總額1億元，咁計數即係幫到50個員工，更加係以先到先得形式。絲絲聽到當堂流晒口水！
原來海通由○八年開始有M.T.計劃，每年大約請10幾個大學畢業生。由舊年開始，表現好嘅M.T.仲有機會去海外做交流生添。聽落都覺得吸引，但好明顯，又交流生、又借錢畀員工買樓咁，做咁多嘢相信都係想綁住呢班公司生力軍，等佢哋專心喺公司發展，無咁易會跳槽！
余絲韻