絲絲講場：里昂風水測出股災月

佢哋又指，今年未必有「五窮六絕七翻身」，皆因風水指數估計，新曆五、六月市場信心回暖，有錢賺，但七月中旬勢必低收，九月會出現下半年「最大一跌」！十一月係全年最佳月份，去到十二月股市仍然會跌，但成個豬年嚟計，股市會以「豐收」作結。

買科技股 咪掂金融機械

睇番七一年、八三年、九五年同○七年，四次豬年港股都係升市收場，股友咁醒實知要點部署，但有無心水買乜先？中信里昂證券分析師蘇敬培話，預計屬「火」嘅行業如科技、互聯網、電訊及電力股表現靚仔，而電訊、石油副產品同公用股都唔錯。到夏天季尾可以吼實屬「土」嘅建築同房地產，下半年到旅遊、油漆、物流、酒店同航運業發圍。不過，記得要小心屬「金」嘅金融同機械股。

另一位分析師陳舒婷就無預測本港樓價，但今年八白武曲星居正中，係財富所在，包括葵涌，亦睇好北面，可以喺羅湖買物業投資，要避免西南、東北，因為會帶嚟疾病同災禍！

至於一直困擾全球股市嘅中美貿易摩擦又點？蘇敬培話，美國總統特朗普屬狗，仲要係隻「火狗」，但今年狗仔運程麻麻，提議特朗普可以做「SPA」兼浸溫泉放鬆吓，保持思路清晰，咁就可以冷靜咁處理中美貿易問題喇。

余絲韻