絲絲講場：小米雷軍發布會狂轟華為

話說，上周四紅米Redmi品牌獨立及紅米Note 7新機發布會上，雷軍躁話「友商的子品牌，懟了我五年時間」，又話人哋「從誕生之日，就怎麽Low怎麽來」（Low者，差也）。「創辦小米前，我曾是華為的鐵桿粉絲，會背任正非（華為創辦人）很多講話！」佢咁講，「友商」係邊個，明啦。

機款及賣法逐樣鬧

雷總仲話，「友商」經常攻擊小米「飢餓行銷」（即是出貨量少，造搶購假象）、係「PPT手機」（Pre-Production Test手機是也，即是被人窒新機齋發布但唔開賣）。

呢個時候，台上大銀幕映住華為商城嘅畫面，顯示華為上月初發布嘅新機nova 4至今仍未有確實出貨時間，雷總指住鬧「這不就是PPT手機嘛！有本事你拿貨出來賣啊！」仲話「要是哪天把我惹急了」，就大爆「穿孔屏（華為nova 4賣點）的多少個弱點和技術不成熟的地方」！

華為同子品牌榮耀，與小米之間嘅比較，都唔係今時今日嘅事，連雷總都話呢五年來自己「從來沒有回應過」，咁做乜嗰日忽然咁火咬住唔放？

網民一條問題變導火線？

嗱，就咁嘅，有人發現同一日，有個聲稱獲認證嘅「雷軍」帳戶喺「知乎」網站關注咗個問題，就係「同樣是國產手機，為甚麼華為是民族品牌，而在印度市場佔有率第一的小米卻不是民族驕傲？」唔通係嬲呢樣？

不過，個帳戶隨後又取消關注個問題。而雷總被問到時，就話「知乎帳戶真的是我開的麽？」話有可能唔係佢開喎，又話自己成年都冇上過「知乎」咁話。Well……唔知呢？

余絲韻