絲絲講場：金發局大執位超震撼！
唔經唔覺，政府金融「智囊」金融發展局已成立六年，換句話講，首批獲委任嘅「開荒牛」成員，任期已夠六年，按慣例需要退任。數數手指，呢班金發局「忠實擁躉」人數多達十名，佔現時金發局廿六名成員超過三分一，比例咁大，所以金發局今次換屆「大執位」都幾震撼！
絲絲睇番資料，由一三年一月起出任金發局成員達六年嘅，包括洪丕正、陳爽、李細燕、李君豪、倪以理、秦曉、謝湧海、葉招桂芳、安納德及馬雪文。
冀新組合更多元化
佢哋當中有唔少更加係金發局骨幹成員，為該局寫咗唔少研究報告，真係出心又出力！好似秦曉、葉招桂芳、洪丕正同倪以理，就分別係金發局內地機遇小組、拓新業務小組、市場推廣小組同人力資源小組召集人。
李律仁去年七月接替史美倫做金發局主席時曾經講過，以往金發局喺股票範疇嘅倡議已很多，未來就定息、保險同資產管理範疇將會有更多提議。所以佢希望今年一月金發局換屆，喺成員組合上會更多元化。因此計絲絲話，可以預期，換屆後將會有更多來自不同背景嘅專才會加入金發局。
公開招聘全職人員
雖然將會有多位資深成員退任，但金發局依家正密鑼緊鼓搞緊公司化，將來可以喺外面請全職人員協助金發局，所以運作不會受影響。佢哋依家正公開招聘執行董事、政策研究、市場推廣，同企業發展及行政等人員。按照時間表，金發局今年四月將會向立法會財經事務委員會簡介過去一年嘅工作進展，相信屆時就公司化應該有明確進展。
余絲韻