絲絲講場：橫行職場十大渴市技能

根據美國勞工部統計，依家全美有超過700萬個職位空缺。由於當地就業市場氣氛唔錯，有唔少企業已經降低學歷要求，例如Alphabet、蘋果公司（Apple Inc.）、國際商業機器（IBM）等。佢哋唔再要求應徵者擁有學士學位，而係強調「特殊技能」同「經驗」。

根據大型求職社交平台得出嘅10大最渴市求職技能，就算你無大學學位，亦可以出人頭地！

五大軟技能 最緊要創新

所謂嘅「軟技能」，即係除咗「畀心機讀書」以外嘅技巧，你自問有無具備以下5項呢？（排名第一為最重要）

1. 創新能力 現今科技日新月異，唔好以為可以「一本通書睇到老」，謹記「剎那光輝不是永恒」嘅道理。

2. 說服能力 不單止對老闆或者上司，同事之間亦都需要妙語連珠。

3. 合作能力 唔好以為可以做獨行俠，背後測試你嘅幽默感、謙卑程度、語言技巧等。

4. 適應能力 唔好怕踏出自己嘅Comfort Zone，要面對出面各種嘅挑戰，如果抱住「在家千日好，出外半朝難」嘅態度，就會好難生存（口架）喇！

5. 時間管理 做嘢唔單止講求辦事效率，更重要嘅係點樣建立可持續嘅「高質素效率」。

學識硬技能 稱霸各行業

另方面所講嘅「硬技能」，即係個人嘅真才實學，說穿了，都係配合未來科技發展嘅大趨勢啫！同樣，排名第一為最重要。

1. 雲計算 呢個係未來最渴市嘅技術，亦都係大勢所趨，就算知識上追唔上，都要知道股市上邊啲上市公司係「龍頭」！

2. 人工智能 依家各國都力爭做5G「一哥」，就係為咗發展人工智能（AI）。身為打工仔，唔可以唔知呢項科技係乜，因為隨時會影響令你「飯碗」不保。

3. 分析理據 現今上網就可以獲得海量資料，至於點樣篩選有用嘅資料，落正確決策先係值錢之處。

4. 人事管理 喺群體裏面，「人」係最難去管理，尤其係時下年輕人普遍「唔憂做」，點樣去提升士氣可以話係十分關鍵！

5. UX設計 UX設計嘅中文翻譯係「使用者經驗設計」，佢係一門將數據分析應用到實際產品，同埋介面設計嘅技能。講白少少，即係點樣可以將數據變成「生財工具」囉！

余絲韻