Market Insight：中資券商股順勢跟進

恒指偷步抽升561點，收報25,626點，國指則升194點報10,029點，主板成交增至804億元，至於滬綜指都升番2%。

中美貿易戰都打咗成三季，從去年十二月內地官方及財新製造業PMI反映內地經濟受打擊非淺，再係咁落去隨時出事。加上春節臨近，如果新年都刺激唔到消費，一個唔好彩外圍有乜冬瓜豆腐，咁一九年真係無眼睇。當然，除人行放水外，市場憧憬中美今個星期貿易磋商會有好消息，都係刺激股市的因素。

魚缸水到即有利可圖

從基本面睇，中央放水，股市能否「水到渠成」就未知，但部分直接受惠的板塊，短期氣氛就必然有改善，最直接的首推券商股。事關無論大市升定跌，魚缸「有水到」自然有利可圖。

中信證券（06030）、海通證券（06837）、中國銀河（06881）、廣發証券（01776）、HTSC（華泰證券）（06886）以及中金公司（03908）等上周五全線抽上，可順勢跟進。

相對而言，港交所（00388）以及本地證券股並非直接受惠，只可作為次選，除非港股整體氣氛突然大幅改善，否則都係直接吼中資券商股較上算！

另外，若然市場氣氛因為人行放水而大幅改善，則權重股有機會跟隨指數向上，首選又係隻騰訊（00700）。無他，大戶要推升指數就必須靠比重最大的騰訊，所以如果要博港股反彈，簡簡單單買騰訊，亦算係懶人投資法之一。

走勢上，騰訊股價早前已彈過一輪，近期主要在300至325元水平反覆，短期若在大成交配合突破320元短線阻力，應可順勢再上。不妨吼位買入，目標價335元，止蝕位309元。

內銀未必能有福同享

至於其他中資金融板塊，就唔建議大手押注。事關中央今轉放水，重新展開「大水漫灌」，暗示內地經濟或到了「不救不可」的地步，試問作為百業之母的內銀豈會有生機？其次，未來若有部分中小型民企救唔番，或內地爆出新一輪債務危機，屆時內銀又不得不「犧牲小我，完成大我」，增加內銀未來壞帳風險。

另外，魚缸有水到，A股長遠救唔救得番就未知，但內險股的投資收益點都會受惠。可惜睇見中國人壽（02628）及中國平安（02318）兩隻龍頭內險近期的走勢，又真係買唔落手！

古勝