絲絲講場：隱形電池大王發迹史曝光
深圳上市民企欣旺達（300207.SZ）可謂名不見經傳，但原來佢專門生產Apple、華為、小米、OPPO和聯想等智能手機專用鋰電池，一七年度相關業務生意額有成104億元人民幣，係內地嘅「隱形電池大王」。創始人王明旺與王威兩兄弟九十年代初睇準智能手機前景，毅然投身生產手機鋰電池行業，由於眼光獨到，才有今日嘅成就。
九七年成立嘅欣旺達，從一間只有幾個人嘅加工廠起家，最初生產俗稱「大哥大」手機嘅電池。轉眼間，依家已經係全球新能源企業五百強之一，亦係深圳創業板嘅上市公司，員工有兩萬幾人。截至周五為止，公司最新市值達128億元人民幣。兩兄弟分別持股28.23%同埋8.56%，價值42億元同埋12.7億港元。目前大哥王明旺已退居幕後，日常業務交由擔任董事長嘅弟弟王威主理。
搏命返工睇通行業前景
王明旺出身貧苦，好早就出來打工，佢啱啱步入社會，就入咗一間鋰電行業嘅港資企業工作，每日由早上八點工作到凌晨一點，試過半年都未放過一日假。嗰段工作經歷，令佢睇到電池行業前景。
對於欣旺達奮鬥超過廿年，王明旺就話，仲記得當年山寨手機產業喺深圳野蠻生長，有好多山寨手機商排隊，攞住現金想搵佢幫手生產手機電池，但都被佢拒絕咗。王明旺就話，如果當年淨係顧住做品質要求唔高嘅山寨機電池，成間廠嘅品質就會失控，又點會有今日？
余絲韻