近兩日市場氣氛有所回暖，周三晚道指升番157點，港股昨日裂口高開高走，恒指最終升337點報26,524點，一舉重上10天及20天線，主板成交793億元。
昨日上升板塊唔少，尤其是受惠於憧憬中央經濟工作會議有好消息，鋼鐵、基建及水泥股都獲資金追捧。不過，手機設備股則受高通再敦促美國國際貿易委員會（ITC）禁止進口蘋果公司採用英特爾晶片的iPhone之消息拖累，手機板塊短期都係觀望為宜。
下周就到聯儲局公布議息結果，雖然唔知主席鮑威爾會唔會聽老闆話煞停加息，但市場近期對美國加息周期將完結之預期的確日增。同時「侵侵」不惜以華府停擺作籌碼，威脅國會通過興建美墨圍牆之撥款。
在如此多不明朗因素下，美匯腳仔軟亦好正常，昨日執筆時已落番97樓下，間接有利人仔企穩。早前古勝提過可重新納入觀察名單的中資航空股昨日見起動，不妨望多兩眼。
從基本面睇，人仔回穩當然有利主要以人仔作收入的中資航空股，而早前急跌一輪的國際油價，近期僅企穩但暫未見大彈（紐約期油昨執筆時在51.2美元），若短期內油價維持在現水平，同樣有利降低航空公司營運成本。
此外，臨近新年，東方航空（00670）與中國國航（00753）已率先宣布上調京滬航線票價，漲幅達一成，料有關行動將誘使大行對板塊重估。所以從牌面睇，中資航空股再起動的誘因確唔少。
東航與國航昨日分別升4.9%及3.5%，至於南方航空（01055）則漲3.6%，三股皆從近期橫行區靠近底部位置反彈，投資者有條件吼位搭轉短途機。
古勝