絲絲講場：馬化騰勁歌熱舞氹員工
日前喺騰訊控股 （00700）一八年度員工大會上，主席馬化騰攜同總裁劉熾平等眾多高管進行才藝表演！大家一齊又唱又跳騰訊視頻製作嘅熱爆內地選秀節目「創造101」主題曲，誰知呢段視頻迅即登上微博熱搜，唔少網友將馬化騰比喻為「創造101」嘅總冠軍、「火箭少女」孟美岐。
呢次唔係馬化騰首次上台演出，今年初騰訊年會上，佢就化身hiphopman，戴住副黑超同埋金色BOSS頸鏈好深情咁演唱《至少還有你》，同樣熱爆。
喺員工大會上，馬化騰講到過去一年最大感受嘅係責任，借助騰訊20周年契機，反思騰訊嘅使命和願景，勢要真正成為「最受尊敬互聯網企業」。
騰訊音樂美掛牌升7.6%
講開音樂，騰訊旗下嘅騰訊音樂周三喺美國掛牌，股價首日收報14美元，較定價13美元高7.69%，周四早段曾報14.46美元，升逾3%。
騰訊昨日宣布，喺明年一月四號，每持有3,900股（39手），就可揀收取1股騰訊音樂，或相當於13美元嘅港幣現金。以騰訊尋日收市價318.6元計，要揸124.25萬元貨先有1股騰訊音樂。唔夠3,900股亦唔使灰心，每夠1,500股（15手，尋日收市時值47.79萬元）可獲現金39元，其後每夠500股將獲派現金13元。不過，如果連1,500股都冇，就乜都無囉！
余絲韻