絲絲講場：創銀出書賀七十歲生日
創興銀行（01111）由當初華資變成中資背景，可以話見證住華資銀行興衰，趁住今年創行七十周年，搵咗暨南大學經濟學院教授馮邦彥寫佢哋銀行嘅發展歷史，原來當年創興銀行首創10蚊開戶殺出一條血路，仲創咗唔少新猷！
馮邦彥話寫呢本關於創興銀行歷史，用咗大半年時間，仲訪問咗歷年老闆同員工，由廖氏家族後人到分行經理都有份，尤其會提及當年吸引小存戶嘅新招數，好似推出高息小額存款，同埋延長銀行營業時間等。
華資以往夠新意，現任創興銀行行政總裁宗建新話，該行未來繼續會積極創新，發展金融科技，尤其係跨境銀行業務同財富管理。
余絲韻