絲絲講場：微軟CEO全美最佳 贏在員工力撐
想學做好老細，不妨學吓微軟CEO納德拉。今年榮膺美國最佳CEO嘅納德拉，雖然知名度係就係唔夠其他企業巨頭CEO勁，但勝在受萬人愛戴。
市值冠全球 居功至偉
根據Comparably.com《2018年美國最佳CEO排名榜》獲獎名單，一四年上任嘅微軟CEO納德拉排名第一，佢跑出原因真係好簡單，就係背後有幾千個微軟員工撐佢，員工畀佢嘅分數高到令人難以置信。
報告話，其實三年幾前，微軟唔係美國科技領域嘅寵兒，但依家成為世界市值最高嘅公司，最新市值高達8,336億美元，微軟員工認為納德拉居功至偉，成功令公司度過43歲中年危機。
咁近年被捧上天嘅美國大型科技龍頭CEO究竟衰啲咩？佢哋大部分人表現平平，負面新聞就多籮籮，公司股價又插水，員工點會唔走。好似亞馬遜貝索斯只排第六，Apple庫克排第12、特斯拉（Tesla）馬斯克排第19、Facebook嘅朱克伯格只排33。連報告都提醒，想做最佳CEO好簡單，只要獲得員工愛戴咪得囉！
另一份由《福布斯》聯合Just Capital公布嘅《美國最優秀企業》排行榜，訪問咗逾8萬名美國人，結果微軟意外地喺綜合評分排第一，成為年度美國最優秀企業，雙喜臨門，絲絲都要向納德拉講番句「我真係恭喜你呀！」
余絲韻