絲絲講場：ofo生死一線主腦有嘢講
舊年五月，全球20國青年選咗高鐵、掃碼支付、共享單車同埋網購，成為當今新四大發明！無諗過一年之後，共享單車兩大龍頭摩拜同ofo小黃車，前者就要「賣身」，後者就陷入財困。
ofo創始人兼CEO戴威日前向全體ofo人（全體員工）發表內部信，宣布對組織架構進行調整。咁大陣仗嘅目的只有一個，就係要增加收入來源！
「跪着也要活下去」
作為領導人嘅戴威語重心長咁話：「冬天已經來臨，風雪亦將隨至。在最困難的時候，我們仍需堅守信念，哪怕是跪着也要活下去，只要活着，我們就有希望！」
佢又話：「所謂危機，就是危險和機遇的並存，只有在最危險的時候才能真正讓我們破釜沉舟，向死而生。當你認為它是危險，那麼危險已經來臨，當你認為它是機遇，那麼機遇即將到來！」
內媒資料顯示，舊年中國互聯網行業融資總額547億美元，共享單車就拎咗37.7億美元，其中摩拜和ofo就佔咗20.15億美元。喺全年融資最多嘅Top 10榜單中，ofo以12億美元排名第五，而摩拜以8.15億美元排第九。點知今年成個共享單車行業出現大逆轉，執完一間又一間，真係來去如風！
余絲韻