絲絲講場：滙豐超低息借錢 益伙記

香港區繼續成為滙豐控股（00005）第三季盈利增長引擎，為集團貢獻半壁江山，香港方面除咗「加假」獎勵員工，亦增加員工嘅息口福利，仲調整咗員工房屋貸款計劃添。

坊間稅貸年息依家閒閒地3、4厘，不過若喺滙豐銀行打工就唔同嘞，聽講佢哋六至二十四個月還款期嘅員工稅貸年利率，只介乎1.66至1.86厘，以還款期一年計，年息亦只係1.8厘。

按揭供款期延長至65歲

再講，唔少滙豐員工個人戶口都Upgrade去卓越理財，呢類戶口嘅一年期港元定存，年息已經有成2.15厘，即是佢哋單純借稅貸去做定期存款，分分鐘可淨賺息0.35厘！所以聽講呢個員工稅貸優惠一出，即成為啲Staff茶餘飯後嘅重要話題，大家已經唔係講借定唔借，而係直接討論今年打算借幾多！

已經好葡萄？未止。滙豐員工按揭計劃亦一向低息，第一層樓嘅按揭利率為最優惠利率（P）減4.5厘，最低息口為0.8厘，九月時滙豐帶頭加息八分之一厘後，絲毫唔影響員工嘅供款，就算十二月再加多次同樣幅度嘅息，依然冇影響！聽講最新個年齡供款期限仲由60歲延長至65歲添。

雖然滙豐明年會加幾多錢人工都仲未有定案，但上述嗰啲嘅員工優惠同埋福利，已經夠晒令到絲絲葡萄！

余絲韻