孖妹S檔案：機械人揀股堅過芬佬？

張：CONTRENDIAN董事總經理 張冠偉

何：CONTRENDIAN董事總經理 何耀東

謝：香港財務策劃師學會副主席 謝汝康

黃：晉裕集團首席投資策略師 黃耀宗

基金公司應用：運用AI技術補人類不足

彩兒：嘩，1萬億元咪即係等於兩個「明日大嶼」項目做價……聽聞機械人採用人工智能（AI）技術，可模仿人類活動及行為，提高產量或效率。若用AI揀股，係咪可以期望有更高投資回報？

張：無錯！我哋早知人嘅弱點，人會貪婪及恐懼，驚輸錢及驚錯失賺錢機會，而做出錯誤投資決定。例如騰訊股價之前升得好癲，但唔少人繼續追入，點知後來跌極都未完。因此，我哋公司嘅五個機械人基金經理，就係運用AI技術選股。

張：不過，AI唔可以取代人，但可互補不足。人有基本常識，識得推論，洞察他人情緒及處理非結構式資料，即報章或抽象嘅臉部表情或衞星圖片等。機械人則識得快速處理大量且多維嘅數據，慳時間及人力，又唔受情緒影響其判斷力等。

CONTRENDIAN張冠偉（右）表示，公司五個機械人基金經理會運用不同數據及算法做投資決定。左為何耀東。	香港財務策劃師學會謝汝康稱，不少基金經理會參考另類數據作投資部署。	晉裕黃耀宗表示，最近科技股表現差，較為睇淡AI概念股。

分析不同數據做決定

Kitty：你哋嘅機械人係點操作？

何：環球資金喺唔同嘅地區、板塊及資產類別中不停流動，所以分析市場交易數據，觀察投資者行動最實際。好過聽佢哋講對後市睇法，因有時你話超級睇淡大市，但卻懶得沽貨，咁你嘅睇法就同股市升跌無關。

張：五個機械人會運用唔同數據及算法做投資決定。分析唔同基本因素及市場表現，例如期權同期貨嘅不同條款，包括不同到期日及行使價等，了解市場情緒。例如，見市場有超買時，就發出沽出信號；有超賣時，發出買入信號，當然仲有其他考慮因素喇。而五個機械人會平均攤分資本。

去年買美股食正升浪

謝：但留意普遍市場數據，例如上市公司年報、交易數字及盈利預測等，對預測未來股價表現嘅參考性愈嚟愈低。除非有專利，咁冇咁多人應用，獲超額回報嘅機會就大啲。

Kitty：好彩佢哋肯花錢咋。

彩兒：過去得出咩入市信號？

何：一六年十一月機械人增持新興市場股票，因當時新興市場嘅價格、估值及市場波動性等表現比其他市場優勝。而一七年尾就由新興市場轉做美股，咁啱食正美股升浪。直到目前，我哋都係All-in美股，無揸任何現金。

彩兒：最近美股表現反覆，大家擔心美股見頂，你哋咁勇嘅？

張：有幾個機械人對於美股最近表現都好警惕，但暫未有發出沽空信號。依家選股策略都以保守為主，所以我哋都唔擔心。再者，佢哋會細緻分析震盪有幾大、幾密、幾長及幾近等，判斷投資組合嘅風險暴露，再調節非現金，以及債券及黃金等避險資產佔比。

彩兒：AI技術同我自己喺Excel做分析有咩唔同？

何：AI係量子計算嘅進化版，除咗快速處理數據，仲識學習、分析結果及判斷數據係咪準確。我哋相信歷史一定會重演，所以用歷史數據做回溯測試。歷史數據包括多個交易所數據，都屬於結構式資料，即係數字。我哋對數據嘅質素要求非常高，要齊全、準確，且與市場升跌有關，咁得出嘅結果先有用。

睇臉色搵線索有難度

Kitty：我聽有金融界行家話，會研究公司於業績發布會前發出嘅新聞稿，以及發布會上該公司CEO嘅眉頭眼額，以預估公司發盈警定盈喜。你哋又有無呢類研究？

張：無呀！我哋無用AI分析非結構式資料，因要將呢類資料轉化成有用資料，有一定難度。況且，業績發布會通常於收市後舉行，至於CEO面部表情又會唔會畀我哋睇得穿呀？此外，公司發出嘅新聞稿有既定格式，又畀律師過目先出，所以想喺度搵線索係非常難。

Kitty：依家有機械人幫你揀股，你哋工作係咪比以前喺資產管理公司打工輕鬆得多？

何：可以話多咗Work-life Balance，但更重要係，喺Robot身上學識咗控制情緒，唔會一見跌市就驚，所有投資決定都要有數據支持。

張：即使Free咗，證監會仍規定我哋兩個唔可以同時間放假。

Kitty：自立門戶搞AI，係咪好好搵？

張：OK啦。我哋更着重呢份工作帶嚟嘅滿足感。

證券界點睇：AI公司分3類 前景參差

Kitty：我想投資AI，有咩可以揀？

謝：AI公司分為三類。第一類係開發機器人或AI構建組件嘅公司，組件包括先進機械、自動系統/自動驅動車輛、半導體或用於機器學習嘅數據庫；第二類係設計、創造、整合或提供機械人或AI產品、軟件或系統嘅公司；第三類係為AI及機械人生態系統提供增值服務，但唔係佢哋嘅核心業務。Nasdaq CTA Artificial Intelligence & Robotics指數就大額投資喺第二類公司，因佢哋製造嘅產品通常為公司帶嚟可觀收入。

黃：最近科技股表現差，我較為睇淡第三類公司，即AI概念股。若要投資，就會揀自行發展AI嘅公司。另外，目前大市下跌風險大，我管理嘅基金有買入美國反向ETF。

Kitty：騰訊股價狂跌，股王地位不保！但不得不承認，第三類公司識利用已研發嘅AI技術，為佢哋嘅業務增值，的確聰明。

自行研發AI公司看俏

黃：涉獵AI技術嘅公司廣泛，相信基金或多或少都會持有，我管理嘅基金最近有短炒晶片股博反彈。我睇好自行研發AI嘅公司，如LHA Market State U.S. Tactical ETF（美股：MSUS）。

謝：然而，自行研發AI嘅公司都算新，多未去到成熟階段，而且未具備三年往績，所以公募及私募基金少採納。再者，若去到公募基金，變得零售化，散戶易接觸，屆時要賺超額利潤就較難。但我覺得，AI係個大趨勢，估計單純靠由下而上、分析基本面嘅方法選股，會跑輸AI基金。Robo Global Robotics & Automation ETF（美股：ROBO）及Global X Robotics & Artificial Intelligence ETF（美股：BOTZ）分別於一三及一六年上市，每年平均回報逾9%及15%。

謝：情況就似ETF，ETF發迹只係短短五年，不過今年管理總資產規模已超越對沖基金管理總資產，所以對於追求絕對回報嘅對沖基金經理嚟講，係好大威脅。

「另類數據」誕生 值參考

Kitty：AI簡直顛覆基金界！

謝：預計目前有六成資產經理，以及七成半對沖基金經理都用緊「另類數據」。因坊間嘅大數據唔可以直接應用，需要金融科技公司利用深度學習算法及神經語言模式，作股票預測。另類數據就係運用機械學習，消化非傳統及非結構式資料，再轉化成結構式資料，幫助判斷市況，為投資者獲取超額利潤及減低投資風險。

彩兒：另類數據有邊幾種？

謝：例如社交媒體數據。喺美國都Hit，可以了解投資者情緒，準繩度有九成。可惜，中國呢方面嘅數據仍未公開，所以窒礙中國AI技術發展。至於網購大數據，例如由淘寶、京東等企業提供嘅，都有分析價值。不過要注意當中有無缺失數據，影響分析結果。另外，內容有幾百頁紙嘅央行會議報告，都需要人工智能去分析，如探討息口對各類股份有幾大影響等。有咗另類數據，就會提供入市信號。若基金經理完全相信入市信號，就可直接按照指示調倉。

Kitty：如果唔係100%相信另類數據呢？

謝：唔信嘅話就要靠自己判斷基本面、計量面及人工智能層面，你話邊類有效啲？