Market Insight：順勢而行 內房龍頭伺機跟炒

等到傍晚騰訊先至公布季績，表現好過預期，截至九月底止第三季，收入按年增24%至805.9億元人仔，純利則按年增30%至233.3億元人仔，扭轉了第二季倒退之劣勢。若與此前綜合12間證券行預測，騰訊第三季純利約184億元人仔比較（又或者一七年第三季180.06億元人民幣比較），今次業績都算喜出望外。

部署上，集團股價早前跌得咁勁，如果今次股價嚟過「物極必反」，相信彈力都唔講得笑。不過，最終上到咩位，視乎大戶睇法同整體氣氛。

利好憧憬提振氣氛

除騰訊季績外，其實近期外圍都多番些少好消息。好似內地公布十月工業增加值及固定資產投資皆勝預期；美國商務部長羅斯表示中方代表團將於短期內訪美，市場憧憬中美貿易戰有轉機；英國脫歐談判亦取得重大進展。

當然，上述因素多少已反映在投資市場上，最明顯就係避險需求減少，美匯指數似有見頂回落迹象，昨日歐洲市初段就跌到落97.2水平，並直接利好包括人仔在內的外幣，以及中港股市走勢。睇番昨日人民幣兌每美元中間價為6.9402，較上日開市價再升227點子，算係強番些少。

對人仔匯率敏感的內房股昨日逆市上升，好似中國海外（00688）、中國恒大（03333）、碧桂園（02007）及萬科（02202）等均逆市向上，唔通板塊真係見咗底？

現時話內房股已見咗底，仲係言之尚早，但只要人仔跌勢有所喘定，加上板塊氣氛改善下，內房短期借勢再彈都唔出奇。

至於美銀美林近日就發表報告，指大部分內房皆同意內房政策風險已見頂之觀點，但須視乎中央明年會否及何時放寬調控政策。該行又指，考慮到短期內未見有政策放寬的可能，以及內地流動性仍緊張，故預期市場對內房股普遍仍負面。

中國海外入貨首選

策略上，買內房只可趁有鑊氣時短炒，所以要買都揀番一線龍頭內房為宜，好似中海近期高位級級上移，值得逢低吸納，目標價睇26元，下方支持位22.5元。同為藍籌的華潤置地（01109），股價近期主要在24至29元水平反覆上落，惟低位呈級級落，故只可作次選。相對地，碧桂園股價暫時仍未擺脫一浪低於一浪之勢，短期雖有勢反彈，但未重上10元心理關口前，只可納入觀察名單。

古勝