絲絲講場：迪士尼CEO 4.6億花紅凍過水

公司五年來收入未達標

正如迪士尼公司咁，最新公布截至九月底止年度經營收入為157億美元，過去五年夾夾埋埋只係得739億美元，仲未達到760億美元嘅目標。作為CEO嘅艾格，就可能因為咁而冇咗6,000萬美元（約4.68億港元）嘅花紅！

艾格簽大刁獲股票獎勵

之但係，艾格又唔使心灰喎！因為迪士尼董事會可以運用權力，重新執過個入帳方式，咁樣收入自然就會達標。而外界分析亦相信，董事會依個舉動仲可以防止今年已經67歲嘅艾格離職。不過，迪士尼至今仍未披露會唔會進行任何調整，算係鼓勵一下呢位CEO。

如果公司調整入帳方式，而令收入達標，就有機會令艾格今年收到歷來最多嘅花紅。其實，佢上年先至簽咗一份新合約，涉及收購21世紀霍氏公司，呢單Deal就已經令佢有權獲得額外1億美元（約7.8億港元）嘅限制性股票獎勵。

而根據彭博薪金指數顯示，單計艾格近年平均年薪達到4,000萬美元，佢就已經係美國上市公司薪酬最高嘅主管！

余絲韻