Market Insight：港股未脫上落市 小注為宜

當然，大家都話資金等「變質股王」騰訊（00700）周三公布第三季業績先會咁。不過，要留意如今距年尾只不過仲淨番個半月，若以時間序去睇，下個星期美國感恩節前後例靜，之後只有十一月底G20峰會中美元首會面，以及十二月聯儲局議息會議等兩大主題，如果大戶連粉飾櫉窗都唔做，就真係無乜好炒，所以港股轉靜都幾合理。

氣氛欠佳 舜宇捱沽

事實上，昨日幾隻權重股表現都唔算太差，友邦保險（01299）、滙豐控股（00005）及中國移動（00941）升幅介乎0.6至1.7%，若然唔係騰訊拖住後腿，港股隨時可以跟住A股上。從走勢睇，恒指暫時下方支持位為24,500點水平，上方則受制於26,500點水平，在未破位前只可視港股為上落市況，部署上以小注短炒為主，寧可密食當三番，不宜作單邊市策略進場。

舜宇光學（02382）上周五公布十月份的營運數據唔錯，昨日股價一早高見過75.65元，惟最終要跌0.5%收市。睇番舜宇股價已六連跌，下跌主因是智能手機市場疲弱、貿易戰憂慮以及盈利前景難以樂觀等。當然，現時市場的氣氛對其走勢影響更大。

即使舜宇十月手機鏡頭出貨量按年升73.9%；車載鏡頭出貨量上升23.4%；手機攝像模組出貨量升54.5%，條數睇落確實唔錯，但市場唔buy就乜都假。加上美國科技股亦轉弱，要資金押注落跌勢已成的舜宇上有一定難度，尤其是往績市盈率仍達21倍的偏高水平，睇怕股價都仲有得調整。

「雙11」未為小米沖喜

另外，內地一年一度的「雙11網購節」交易總額再創紀錄，小米集團（01810）亦乘勢宣布單日支付總額突破52億元人仔，股價昨日一度炒高至13.56元，可惜午後卻轉為級級落，最終跌0.4%收報13.14元，好明顯係虛火。

其實近排新經濟股無段好睇，故在部署方面，一日未見領頭羊騰訊轉勢，都係將整個板塊放埋一邊先。

古勝