絲絲講場：深交所催老乾媽上市關件衫事？

深圳交易所八月時去同賣辣醬嘅民企「老乾媽」做「上市培育」，講白啲，即係催公司上市，當時老乾媽表明話無計劃上市。但呢幾日內地網再傳公司被催上市，唔通關老乾媽件辣醬Hoodie早排喺美國紐約時裝周爆紅嘅事？

老乾媽創辦人陶華碧已七十歲，佢原本係山村農婦一名，喺街賣涼粉與冷麵，啲自製辣醬原本用來拌涼粉，點知大受歡迎變做主角，九六年陶老太索性搞廠生產辣醬。

公司依家年銷售額有成幾十億人仔，撐起貴州經濟，陶老太亦被封「國民女神」！

隻辣醬仲紅出海外，喺Amazon賣近16美元一樽！連今年九月紐約時裝周嘅Pop-Up Store，都有老乾媽大嘜頭嘅連帽衞衣賣，盛惠120美元一件，想買仲要瘋搶！

雖則陶老太多年奉行三不：不貸款、不融資、不上市，但阿「國民女神」今時「走出去」變埋潮牌，怕且當局會更肉緊箍實佢！

余絲韻