絲絲講場：股市靜 經紀一周開得3日工
近排個市咁淡，成交更一浪低於一浪，尋日港股成交更得番七百幾億元，好多證券經紀大吐苦水，呻話依家根本開唔足工，一個禮拜只係返到三幾日工，有啲經紀就話要隔日返工！佢哋仲話，以往咁多年都未試過咁！
做得經紀呢行，其實預咗「好天搵埋落雨柴」，但有資深經紀同絲絲講，呢排真係好冇生意，「電話都唔響，一日都開唔到幾張單！」依家有WhatsApp、WeChat等，可遙遠控制，惟有一個禮拜返幾日工，慳番啲搭車錢。「唔係唔想做，係冇得做！有生意你估我唔想坐定定喺公司接電話？」
呻個市古靈精怪
佢依家嘅「職場」生活點過？就係朝早喺屋企上網（目及）實啲股價，若真係有客想買賣，咪打返公司正式落盤。佢自言自己都快六十歲，好快退休，因此返唔返工都冇乜所謂，但就戥其他行家肉緊，直言小經紀已沒落！
佢仲話，估計行內約有一半經紀都好似佢咁。但佢補充，佢講緊係純替客落盤嘅股票經紀行家，但如果係證券行管理層、RO（負責人員）、後勤職員等，當然仍要日日返工！
咁慘，會唔會有經紀要兼職揸的士幫補收入？佢就話好難講，仲話個環境的確係好差，散戶參與股市嘅比例愈來愈低、部分證券行又「零佣金」、證監會又收緊孖展借貸、又話要加強合適性規定，經紀都唔願再畀投資意見，加上個股市又古靈精怪，應升又唔升，北水又落唔到嚟香港，都令投資意欲減低。
佢仲話，好多行家都睇淡個市，就算反彈都好快啲走，寧願錯失機會，都唔想被綁，未來兩年揸現金最穩陣。睇嚟，股民真係要綁好安全帶，自求多福！
余絲韻