孖妹S檔案：滬港通4周年 戰績大檢閱

鄔：亞洲金融風險主席 鄔思彥

Calvin：香港程式交易研究中心總裁 蔡嘉民

凌：理大金融學碩士畢業生 凌俏

沈：內地散戶 沈偉民

蔡：內地散戶 蔡先生

盧：內地散戶 盧政

Kitty：滬港通別具意義，代表境內資本市場開放。

彩兒：無錯，滬港通及深港通係香港、上海及深圳股票交易所嘅合作計劃，使國際及內地投資者可以通過本地交易所嘅交易及結算系統來買賣對方市場嘅證券。

亞洲金融風險主席鄔思彥認為，A股需要調整投資者結構。	香港程式交易研究中心蔡嘉民料，A股續陷熊市。	內地散戶蔡先生睇好恒指年底升至28,000點。

北向買A股 市場難玩 投資風險大增

鄔：我炒咗A股逾兩年，無一隻賺到錢。呢兩年A股表現都唔好，所以我只敢小注買入科技股。A股喺個人投資組合佔比少過5%。

彩兒：A股真係咁難炒咩？

Kitty：唉！優質嘅中國科網股都去晒港股或者美股上市喇。

鄔：無錯！再者，分析A股真係好難，唔可以用價值投資法，而且佢十分受國策影響。加上面對聯儲局加息、中美貿戰、中國經濟放緩以及產業整頓等內憂外患，投資風險亦大增。

Kitty：A股八成投資者都係散戶，投資真係睇氣氛，少理性分析。

期望兩地資訊更流通

鄔：然而，就算唔多散戶揸嘅，亦唔代表安全。部分A股貨源歸邊，炒賣情況嚴重，好難捉路，所以我投資多選國企股。

彩兒：點先會增強你對A股嘅信心？

鄔：我覺得A股需要調整投資者結構，專業投資者佔比要高啲；完善退市機制，讓優勝劣汰，不再任由資金主導；化解股權質押問題，減低股票抵押所帶來嘅流動性風險。

再者，目前少港人分析A股，多摸着石頭過河，所以兩地資訊有必要更流通。另外，目前兩地股票稅項，一旦統一，將令投資者或基金感到徬徨，所以期待有更明確稅項指引。內地投資者透過南向交易買賣港股，須在香港繳付印花稅，但香港及海外投資者透過北向交易買賣滬股，則毋須在香港繳印花稅。

北向買A股 年均賺10% 睇資金流部署

Calvin：我炒咗A股逾兩年，每年平均賺一成左右。曾買入中國平安（601318.SZ）、建設銀行（601939.SZ）及工商銀行（601398.SZ），做配對交易（Pair Trade）。例如見建行H股狂升，建行A股較落後，就會買A沽H，博A股追落後。不過要留意，因A股未完全開放，A股價格比H股貴兩至三成係好合理。

彩兒：睇滬港通資金流向，又有無用？

Calvin：有！如果南向（港股通）資金流多過北向（滬股通)，H股就會跑贏A股，咁就買H股。另一個方法係用因子模型，買入估值低，且市值算大嘅A股，同時沽指數期貨，博跑贏大市，賺Alpha，順便對沖市場風險。

A股恐續見熊 基本面淡

Kitty：睇基本面會唔會浪費心機？

Calvin：我相信內地股民會愈嚟愈理性及成熟，所以睇基本面有一定價值。以上呢兩個方法，都唔使理市況係牛定熊，所以預計未來中國經濟未必好，A股續係熊市，基本面仍偏淡，但我嘅投資組合會照舊平均攤分喺港股、A股及美股。

彩兒：你買A股通常揸幾耐？

Calvin：一周至一個月，因要畀0.1%賣方印花稅，故交易頻率唔會好快。

南向買港股 騰訊弱勢 恒指料挫兩成

盧：我九三年開始炒港股，當時港股好炒啲，但之後每況愈下，今年市況唔好，無賺錢。騰訊控股（00700）前幾年都好，依家就跌到殘。我仲揸住騰訊及香港交易所（00388），但好彩唔係今年買，所以都無咩蝕。

Kitty：騰訊，真係好多人中招。

盧：我繼續睇淡，估計騰訊仲會跌多兩成，因其盈利不少由遊戲支撐，但遊戲有好多負評，所以就算中國政府唔打壓，騰訊都要修正業務，尋找新業務增長動力及鞏固其他業務發展。

彩兒：港股整體又點睇？

盧：中線睇淡，正沽空恒指期貨。因為美股進入中期調整，預計道瓊斯工業平均指數會跌20至30%，港股會被拖累，預料恒指將跟隨下跌15至20%。再者，港股流動性愈嚟愈差，買咗好難沽。

Kitty：港美股都遭殃，你會撤資嗎？

盧：順勢而行，沽港股、沽埋道指，加注A股，因A股相對強，其估值比港美股都要低。

理大 凌俏	內地散戶 沈偉民	滬港通小檔案

南向買港股 帳面虧損 縱樂觀拒加注

彩兒：港股同A股，你鍾意炒邊度？

蔡：港股！同一隻股票喺兩地上市，一般H股會平啲。我喺滬港通開通後，開始接觸港股，雖試過輸錢，但之後識揀有名氣，且低估值股份。過去每年平均回報有10%，但今年暫時帳面蝕緊！估唔到恒指曾跌穿25,000點，仲連跌六個月。但跌到呢個位，港股估值唔高，再大跌機會唔大，見唔到似○八年或九七年金融危機。

彩兒：你準備入市？

蔡：唔喇！我揸住好多港股，投資額逾100萬元，一直無沽，帳面蝕緊，唔加注啦。我建議空倉朋友逐啲入，睇好恒指年底升至28,000點。

內房粉絲 睇好券商股

Kitty：你最鍾意邊個板塊？

蔡：內房股，因其估值低，另其物業銷售額一般會延遲一至兩年入帳，所以去年及今年銷量增長勁，料未來一至兩年盈利增長不俗。目前中國經濟唔好，上月底中央經濟工作會議無再提去槓桿或樓市調控，故樓市大跌風險唔大。

就算真係大跌，銀行將面臨信貸危機，相信中國政府唔會袖手旁觀。況且，中美貿易戰，進出口生意減少，中央更要維穩樓市，以保住國家全年6.5% GDP增長。

彩兒：你有無重注邊一隻股票？

蔡：我愛買幾隻，分散風險。我依家揸住中國恒大（03333）、佳兆業集團（01638）及融創中國（01918）等。我料融創中國未來兩年嘅業務增長比中國恒大多。

Kitty：有留意其他板塊？

蔡：睇好券商股，尤其海通證券（06837）及耀才證券金融（01428）。海通係最大嘅中資券商，預料內地企業融資上市生意將會有增無減，前景好。待牛市再出現，市盈率有望上升到10至20倍。

內地人嫌炒港股手續繁

彩兒：你哋好似對滬港通未抱太大信心喎！

凌：我無買港股，門檻太高！內地投資者嘅證券帳戶要有唔低於50萬元人民幣。但若某股兩地都有上市，如中興通訊（00763）（000063.SZ），買入A股前，會參考其港股股價。

沈：我唔炒港股，因為滬港通手續繁複，唔明點解兩個市場嘅代號唔可以一樣。況且，管理投資本身已經好辛苦，都唔想咁麻煩。就好似過大海賭錢，都唔會去晒咁多個賭場。由○五年到依家，我炒A股賺逾30倍。

Kitty：今年都賺？

沈：傻喇。中國經濟麻麻，環球投資環境亦唔好，A股正面對小型股災，我都輸咗一成。

彩兒：咁不如Take個Break先？

沈：喺賭場唔賭邊好玩，另外唔參與就把握唔到行情，又感受唔到投資氣氛，所以輸錢都會繼續陪玩。我靠Feel入市，唔理市況好壞，隨時All-in。A股一直有泡沫，未來一兩年都無希望，但有泡沫又唔代表一定會跌。再者，美股嘅泡沫仲大，因為過去大家有錢，無咩嘢好買，就會買美股。

鄔：A股有下跌風險，仲未反映實際經濟狀況。我會揸美元、日圓避險，另可考慮買入高評級新興市場美元債，但留意早前已下跌不少。

Kitty、彩兒