Market Insight：新經濟概念股光環褪色

相對地，港股一邊受中美貿易戰及人民幣貶值因素影響，同時從中線角度睇，港股要面對另一問題：在美國持續加息下，若然港銀未來唔跟足美息再上，則港元與美元息差擴闊下，將增加走資誘因；但若然跟足，香港經濟及企業又未必能承受加息所帶來的影響，故香港經濟前景不容樂觀，而這亦反映在港股及港股跌幅日深之上。

打救民企 內銀有難

受騰訊（00700）、中國移動（00941）、建行（00939）幾隻權重股，以及一批金融股拖累，恒指上周五急插625點，失守10天線，全周計數累挫884點或3.3%。當中，古勝早前提及內銀股的隱憂，咁快就不幸言中。

由於內媒引述銀保監主席郭樹清表示，考慮對民營企業的貸款實現「一二五」目標，即在新增公司類貸款中，大型銀行對民企的貸款不低於三分之一，中小型銀行不低於三分之二，三年以後銀行業對民營企業的貸款佔新增公司類貸款的比例不低於50%。

在下已講過，中央為着應對中美貿戰、人仔貶值以及實體經濟增速放緩等種種不明朗因素，要作為百業之母的內銀股「幫一幫」民企絕不出奇，但就估唔到咁快已經要講出口，睇怕內地經濟可能比想像中更唔樂觀！如今情況係：政府搵銀行打救民企，可能連內銀都要攬炒，所以短期都係唔好掂呢個板塊！

此外，恒指上周五收市後公布檢討結果，恒指成分股不變，反而國指則加入中國鐵塔（00788），剔出中國銀河（06881），上述變動將於十二月十日起生效。睇番鐵塔近期基本面無乜大消息，而股價亦以反覆上落為主，相信消息對大市都唔會有太大影響力。

另外，「同股不同權」股份近期無乜運行，小米集團（01810）上周五挫3.7%，而美團點評（03690）則瀉5.8%。

「同股不同權」受冷落

講真，自從騰訊轉弱、美國科技股急跌一輪後，已大大影響投資者對新經濟股的信心，其中同股不同權股份更被市場睇低一線，所以就算小米短期即使有好轉迹象，但要博反彈都絕對唔係首選；至於美團，股價自上市後拾級而落，早前連65元都彈唔上，睇勢都要再試番50元關支持，又係唔使諗住。

最後，提多大家一次，恒指早前係以兩個上升裂口反彈近兩千點，一早已經講過係升得來比較虛，加上連50天線都未掂過，上周五已重新失守10天線25,631點，故未來若進一步失守20天線25,524點，恐要下試24,540點；若不幸再失守埋，咁就要睇到落一六年至今年初升浪調整幅度0.618即24,087點先會見到支持。所以大家炒還炒，謹記扣好安全帶先好上車！

古勝